ബൈക്കോടിക്കുമ്പോള് ഫോണില് സംസാരിച്ച് അപകടത്തില്പെടുന്നവരുടെ എണ്ണം ദിനം പ്രതി വര്ധിക്കുകയാണ്. ഹെല്മറ്റ് വെച്ചിരുന്നാലോ ഇത് ഊരി മാറ്റി ഫോണ് എടുക്കുമ്പോഴേക്കും കോള് കട്ടായിരിക്കും. ഇരുചക്രയാത്രക്കാരുടെ സ്ഥിരം വിലാപമാണിത്. ഇത് പരിഹരിക്കാനായാണ് ഹെല്മറ്റ് നിര്മ്മാതാക്കളായ സ്റ്റീല്ബേഡ് രംഗത്തെത്തിയിരിക്കുന്നത്. പുതിയ ‘ഹാന്റ്സഫ്രീ’ ഹെല്മറ്റുമായി സ്റ്റീല്ബേഡ് വിപണിയിലെത്തി.
സ്റ്റീല്ബേഡ് SBA-1 HF എന്ന മോഡലാണ് ഈ സംവിധാനം വാഗ്ദാനം ചെയ്യുന്നത്. HF എന്നത് ‘ഹാന്റ്സഫ്രീ’ യുടെ ചുരുക്കെഴുത്താണ്. 3.5 എംഎം ഓഡിയോ ജാക്ക് വഴി ഫോണ് ഹെല്മറ്റില് കണക്ട് ചെയ്യാന് കഴിയും.
‘ഹാന്റ്സഫ്രീ’ ഹെല്മറ്റുകള് ചുമപ്പ്, കറുപ്പ്, വെള്ള എന്നീ മൂന്ന് നിറങ്ങളില് ലഭ്യമാണ്.
ഹെല്മറ്റില് ഘടിപ്പിച്ചിട്ടുള്ള രണ്ട് സ്പീക്കറുകളാണ് മോഡലിനെ വ്യത്യസ്തമാക്കുന്നത്. ശബ്ദം പ്രതിഫലിക്കാനായി പ്രത്യേക മൈക്രോഫോണുകളും ഉണ്ട്.
പുറത്ത് നിന്നുള്ള ശബ്ദം മൈക്രോഫോണ് പിടിച്ചെടുക്കില്ല. ഫോണ്കോള് എടുക്കാനും കട്ട് ചെയ്യാനും പ്രത്യേക ബട്ടനുകള് ഹെല്മറ്റിലുണ്ട്. പാട്ട് കേള്ക്കാനും ഓഡിയോ ജാക്ക് ഉപയോഗിക്കാം.
സ്റ്റീല്ബേഡ് ബേഡിന്റെ ഔദ്യോഗിക വെബ്സൈറ്റില് 2,589 രൂപയാണ് വില രേഖപ്പെടുത്തിയിരിക്കുന്നത്.
അതേസമയം, വാഹനം ഓടിക്കുമ്പോള് ഫോണ് ഉപയോഗിക്കാന് പാടില്ലെന്ന നിയമം കാറ്റില് പറത്തിയാണ് പുതിയ ഹെല്മറ്റിന്റെ രൂപകല്പന. ഡ്രൈവറുടെ ശ്രദ്ധ ഫോണിലേയ്ക്കും സംഗീതത്തിലേയ്ക്കും വഴി മാറുമ്പോള് നിശ്ചയമായും അത് അപകടങ്ങലുടെ ക്ഷണിച്ചുവരുത്തല് തന്നെയാകും. പിന്നില് വരുന്ന വാഹനങ്ങളുടെ ഹോണോ മറ്റു ശബ്ദങ്ങളോ കേള്ക്കാന് പറ്റില്ലെന്നതും ഇതിന്റെ ഒരു ന്യൂനത തന്നെയാണ്.
