ഫോഡ് ഫിഗോയുടെ 2019 പതിപ്പ് പുറത്തിറക്കി. പുതിയ പതിപ്പില് ബാഹ്യ അവതരണത്തില് ഒട്ടേറെ പ്രത്യേകതകളോടെയാണ് അവതരണം. പുതിയ പതിപ്പിന്റെ എക്സ് ഷോറൂം വില 5.15 ലക്ഷം രൂപയാണ്.
ഫോഡ് ഫിഗോയുടെ പുതിയ പതിപ്പ് മൂന്ന് വകഭേദങ്ങളിലാണ് ലഭ്യമാകുന്നത്. ആമ്പിയന്റ്, ടൈറ്റാനിയം, ടൈറ്റാനിയം ബിഎല്യു എന്നീ വകഭേദങ്ങളിലാണ് അവതരിപ്പിച്ചിരിക്കുന്നത്.
ഇനി പുതിയ പതിപ്പിന്റെ ഹൈലൈറ്റ്സ് നോക്കിയാല് ഉയര്ന്ന ബോണറ്റുകളിലും, മുന്വശത്തെ ഗ്രില്ലുകളിലും ഫോഗ് ലാമ്പിലും പ്രകടമായ മാറ്റങ്ങള് കാണാനാകും. പുതുക്കിയ അലോയ് വീലുകളും ടെയില് ലൈറ്റുകളും ഉയരത്തിലെ വ്യതിയാനവുമാണ് നവീകരിച്ച മോഡലില്.
ടൈറ്റാനിയം ബിഎല്യു മോഡല് കുറച്ചുകൂടി സ്പോര്ട്ടി ലുക്ക് നല്കുന്നു. 15 ഇഞ്ച് അലോയ് വീലുകളും കറുത്ത മേല്ത്തട്ടും സ്പോര്ട്ടി ഔട്ട് ലുക്കിന് മാറ്റ് കൂട്ടുന്നു. ബിഎല്യു മോഡലിലെ സീറ്റുകളില് നീലനിറത്തിലുള്ള തുന്നലുകളും,ബിഎല്യു എന്ന അക്ഷരങ്ങള് കൊത്തിയിട്ടുമുണ്ട്.
2 എഞ്ചിന് മോഡലുകളിലാണ് മോഡലുകള് വിപണിയില് ലഭ്യമാകുക. 1.2 ലിറ്റര് പെട്രോളും 1.5 ലിറ്റര് ഡീസല് മോഡലുകളിലുമാണ് ലഭിക്കുക.
1.2 ലിറ്റര് 3 സിലിണ്ടര് പെട്രോള് മോഡല് 96 ബിഎച്ച്പിയും 120 എന്എം ടോര്ഖും 1.5 ലിറ്റര് 4 സിലിണ്ടര് ഡീസല് മോഡല് 100 ബിഎച്ച്പിയും 215 എന്എം ടോര്ഖും സൃഷ്ടിക്കാനാകും. 5 ഗിയര് മാനുവല് ഗിയറാണ് രണ്ട് മോഡലുകളിലും ഉപയോഗിക്കുന്നത്.
ടൈറ്റാനിയം ബിഎല്യു 1.5 ലിറ്റര് പെട്രോള് എഞ്ചിനുകളിലും ലഭ്യമാകും. ഇത് 123 ബിഎച്ച്പിയും 170 എന്എം ടോര്ഖും സൃഷ്ടിക്കും.
ഇനി അകത്തളത്തുള്ള നവീകരണത്തില് എടുത്ത് പറയത്തക്കത് 7.0 ഇഞ്ച് ടച്ച് സ്ക്രീന് ഇന്ഫോടെയ്ന്മെന്റ് സിസ്റ്റം , സ്റ്റിയറിങില് തന്നെ ഓഡിയോ നിയന്ത്രിക്കാനുള്ള സംവിധാനങ്ങള്, നാവിഗേഷന് സംവിധാനങ്ങള്, ആറ് എയര് ബാഗുകള്, ഹൈ സ്പീഡ് അലേര്ട്ടുകള്, സീറ്റ് ബെല്ട്ട് റിമൈന്ഡര്, എബിഎസ്-ഇബിഡി സംവിധാനങ്ങളും, പാര്ക്കിങിന് പിന് ക്യാമറകളും പുതിയ പതിപ്പില് അവതരിപ്പിച്ചിരിക്കുന്നു.
ഫിഗോയുടെ പുതിയ പതിപ്പ് ഹാച്ച് ബാക്ക് ശ്രേണിയില് പുതു തരംഗം സൃഷ്ടിക്കുമെന്ന് തന്നെ കമ്പനി അവകാശപ്പെടുന്നു. വിപണിയില് മാരുതി സ്വിഫ്റ്റിനും, ടാറ്റയുടെ ടിയാഗോയ്ക്കും ഹ്യുണ്ടായിയുടെ ഐ10 മാകും ഫിഗോ പുതിയ പതിപ്പിന്റെ എതിരാളി. എന്നാല് പുത്തന് അവതരണ ശൈലികൊണ്ടും കരുത്ത് കൊണ്ടും ഫിഗോ എതിരാളികളെ കടത്തിവെട്ടുമെന്ന് തന്നെ കരുതാം.
