സ്മാര്ട്ട് ഫോണ് വഴി കാറിന്റെ ആകെയുള്ള നിയന്ത്രണം ഉറപ്പാക്കി ഹ്യുഡായി വെന്യൂ. ഇത് സാധ്യമാക്കുന്ന ബ്ലൂ ലിംഗ് ടെക്നോളജിയോടു കൂടിയാകും ഹ്യുഡായിയുടെ പുതിയ എസ്യുവി വെന്യൂവിന്റെ അവതരണം. 33 തരത്തിലുള്ള ഫീച്ചറുകളാണ് ബ്ലൂ ലിംഗില് ഉള്പ്പെടുന്നത്. ഇതില് ഇന്ത്യന് റോഡുകളില് അനുയോജ്യമായ 10 പ്രത്യേക ഫീച്ചറുകളും ഉള്പ്പെടും.
കാര് ഡ്രൈവിങ്ങിനിടെ ആവശ്യമായ മുന്നറിയിപ്പുകള് നല്കുമെന്നതാണ് ബ്ലൂ ലിംഗ് ടെക്നോളജിയുടെ പ്രത്യേകത.
വേഗത സംബന്ധിച്ച മുന്നറിയിപ്പുകള്, പാര്ക്കിങ് അസിസ്റ്റന്സുകള്, എത്തിപ്പെടേണ്ട സ്ഥലമോ വഴിയോ സംബന്ധിക്കുന്ന വിവരങ്ങള്, ഡോര് ലോക്കിന്റെ നിയന്ത്രണം, ഹോണ്, ലൈറ്റ്, കാര് പാര്ക്ക് ചെയ്തിരിക്കുന്ന ഇടം ക്ലിപ്തപ്പെടുത്തല്, കാലാവസ്ഥാ വ്യതിയാനങ്ങള്ക്കനുസരിച്ചുളള ക്രമപ്പെടുത്തല് തുടങ്ങി ഡ്രൈവറുടെ ജോലി എളുപ്പമാക്കുന്ന വാഗ്ദാനങ്ങളാണ് ബ്ലൂ ലിംഗ് നല്കുന്നത്.
ഹ്യുന്ഡായി ഇന്ത്യന് റോഡുകളിലെ ഗതാഗതസംവിധാനങ്ങള്ക്കനുസരിച്ച് ബ്ലൂ ലിംഗ് പരീക്ഷിച്ചെന്നും ഇത് വന് വിജയമായിരുന്നെന്നും വ്യക്തമാക്കി.
ഇംഗ്ലീഷിലാണ് മുന്നറിയിപ്പുകള് ലഭിക്കുന്നത്. എല്ലാ പ്രദേശങ്ങളിലുള്ള ആള്ക്കാര്ക്കും ബ്ലൂ ലിംഗിന്റെ പ്രയോജനം ലഭിക്കുന്നതിനായി സംസാരഭാഷയിലുള്ള ഇംഗ്ലീഷാണ് ഉള്ക്കൊള്ളിച്ചിരിക്കുന്നത്. ബ്ലൂ ലിംഗിന്റെ നിയന്ത്രണം സ്മാര്ട്ട് ഫോണ് വഴി സാധ്യമാകും.
ഇന്ത്യന് വിപണിക്ക് അനുയോജ്യവും പ്രായോഗികവുമായാണ് ബ്ലൂ ലിംഗിന്റെ അവതരണമെന്ന് ഹ്യുന്ഡായിയുടെ എംഡി സിയോണ് സിയോബ് കിം പറഞ്ഞു.
വോഡാഫോണ് ഐഡിയയുമായി ചേര്ന്നാണ് ബ്ലൂ ലിംഗിന്റെ പ്രവര്ത്തനം ഏകോപിപ്പിച്ചിരിക്കുന്നത്.
വെന്യൂ ഏപ്രില് 17 ന് കമ്പനി ഔദ്യോഗികമായി അവതരിപ്പിക്കും. ജൂണ് മാസത്തോട് കൂടി ഇന്ത്യന് വിപണിയിലെത്തുമെന്നാണ് കരുതുന്നത്.
ഹ്യുന്ഡായി വെന്യു പെട്രോള്, ഡീസല് എന്നിങ്ങനെ രണ്ട് വകഭേദങ്ങളിലും ലഭ്യമാകും. കമ്പനി പുതുതായി വികസിപ്പിച്ച 1.0 ലിറ്റര് മൂന്ന് സിലിണ്ടര് ടര്ബോ എന്ജിന് യൂണിറ്റ് 110 ബിഎച്ച്പി കരുത്ത് സൃഷ്ടിക്കാനാകും.
വെന്യുവിന്റെ ഡീസല് പതിപ്പില് 1.4 ലിറ്റര് ടര്ബോ എന്ജിന് യൂണിറ്റ് 89 ബിഎച്ച്പി കരുത്തും 220 എന്എം ടോര്ഖും സൃഷ്ടിക്കും. ആറു സ്പീഡ് ഗിയര്ബോക്സാണ് ഉള്ളത്. രണ്ട് എയര് ബാഗുകളാണ് ഉള്ക്കൊള്ളിച്ചിരിക്കുന്നത്.
മാരുതിയുടെ വിതാര ബ്രീസ, ഫോഡ് എക്കോസ്പോട്ട്, ടാറ്റാ നെക്സോണ്, മഹീന്ദ്ര എസ് യുവി 300 എന്നിവയ്ക്കാകും പുതിയ വെന്യു വിപണിയില് എതിരാളിയാകുക. എട്ടു ലക്ഷം രൂപയാണ് വെന്യുവിന് വില പ്രതീക്ഷിക്കുന്നത്.
