അവഞ്ചര് സ്ട്രീറ്റ് 160 എബിഎസ് ബജാജ് ഓട്ടോ മോഡല് അവതരിപ്പിച്ചു. അവഞ്ചര് സ്ര്ടീറ്റ് 150യുടെ പരിഷ്കരിച്ച പതിപ്പാണ് പുതിയ മോഡല്. സ്പോര്ട്സ് വാഹന ശ്രേണിയിലെ നേതൃത്വം ഉറപ്പിക്കുന്നതിന്റെ ഭാഗമായാണ് കൂടുതല് സുരക്ഷയൊരുക്കി ബജാജ് ഈ ബൈക്ക് വീണ്ടുമെത്തിച്ചിരിക്കുന്നത്. മോട്ടോര് സൈക്കിള് മേഖലയിലെ മുന്നിരക്കാര് എന്ന നിലയില് ക്രിയാത്മകമായ മാറ്റങ്ങളും ഉത്പന്നങ്ങളുടെ വിപുലീകരണവുമാണ് കമ്പനി ലക്ഷ്യമിടുന്നതെന്ന് ബജാജ് ഓട്ടോ ലിമിറ്റഡ് മാര്ക്കറ്റിങ്ങ് വൈസ് പ്രസിഡന്റ് നാരായണ് സുന്ദരരാമന് പറഞ്ഞു
റോഡ്സ്റ്റര് ഡിസൈന് ഹെഡ്ലാമ്പ്, എല്ഇഡി ഡിആര്എല്, ബ്ലാക്ക് അലോയ് വീലുകള്, റബ്ബറൈസ്ഡ് റിയര് ഗ്രാബ് റെയില് തുടങ്ങിയവയാണ് പ്രത്യേകതകള്. ദീര്ഘദൂര യാത്രകള്ക്കും നഗരത്തിലെ യാത്രയ്ക്കും യോജിക്കുന്ന രീതിയില് ഒരുക്കിയെന്നതാണ് ഈ ബൈക്കിനെ ജനങ്ങള് ഏറ്റെടുക്കാന് കാരണം. 14.7 ബിഎച്ച്പി പവറില് 13.5 എന്എം ടോര്ക്ക് എന്നിവയും ഈ ബൈക്കിന്റെ പ്രത്യേകതയാണ്. പള്സര് എന്എസ് 160-ക്ക് കരുത്ത് പകര്ന്നിരുന്ന 160.3 സിസി സിംഗിള് സിലിണ്ടര് എയര് കൂള്ഡ് എന്ജിനാണ് സ്ട്രീറ്റ് 160-യിലും പ്രവര്ത്തിക്കുന്നത്.ഇത് 15 ബിഎച്ച്പി പവറും 13.5 എന്എം ടോര്ക്കുമേകും. 5 സ്പീഡാണ് ഗിയര്ബോക്സ്.
സിംഗിള് ചാനല് എബിഎസ് കൂടാതെ 260 എംഎമുള്ള മുന്നിലെ ഡിസ്ക് ബ്രേക്കും ഉയര്ന്ന ഗ്രൗണ്ട് ക്ലിയറന്സും ഇതിന്റെ പ്രത്യേകതയാണ്. എബോണി ബ്ലാക്ക്, സ്പൈസി റെഡ് എന്നീ നിറങ്ങളില് അവഞ്ചര് സ്ട്രീറ്റ് ലഭ്യമാണ്. 82,253 രൂപയാണ് ഡല്ഹിയിലെ എക്സ്ഷോറൂം വില.