പ്രമുഖ ഇരുചക്ര വാഹന നിര്മ്മാതാക്കളായ യമഹ ഇന്ത്യന് വിപണിയിലെത്തിയിട്ട് 34 വര്ഷം പൂര്ത്തിയാകുന്നു. 1985 മുതല് ഇന്ത്യയില് പ്രവര്ത്തനം ആരംഭിച്ച യമഹ മോട്ടോര്സ് ഇന്ത്യന് നിരത്തുകളില് ഇതുവരെ എത്തിച്ചത് ഒരു കോടി വാഹനങ്ങളാണെന്നാണ് കമ്പനി അവകാശപ്പെടുന്നത്.
ചെന്നൈ പ്ലാന്റില് പ്രത്യേകമായി നടന്ന ചടങ്ങില് യമഹ FZS-FI V3.0 മോഡല് പുറത്തിറക്കിക്കൊണ്ടാണ് ഒരു കോടി വാഹനങ്ങള് നിരത്തിലിറക്കിയ വിവരം കമ്പനി പുറത്തു വിട്ടത്.
സുരജ്പൂര്, ഫരീദാബാദ്, ചെന്നൈ എന്നിവിടങ്ങളിലാണ് യമഹയുടെ ഇരുചക്ര നിര്മ്മാണ കേന്ദ്രങ്ങള്. 77.88 ലക്ഷം മോട്ടോര് സൈക്കിളുകളും 22.12 ലക്ഷം സ്കൂട്ടറുകളുമാണ് യമഹ ഇന്ത്യന് നിരത്തുകളിലെത്തിച്ചത്. ഇതില് 80 ശതമാനം വാഹനങ്ങളും നിര്മ്മിച്ചത് സുരജ്പൂരിലും ഫരീദാബാദിലുമാണ്. 2015 ല് പ്രവര്ത്തനം തുടങ്ങിയ ചെന്നൈയിലെ പ്ലാന്റില് 20 ശതമാനം വാഹനങ്ങളാണ് നിര്മ്മിച്ചിരിക്കുന്നത്.
2012 ലാണ് യമഹയുടെ ആദ്യ സ്കൂട്ടറായ യമഹ റേ അവതരിപ്പിക്കുന്നത്. 2015 ല് പുറത്തിറങ്ങിയ ഫസീനോ സ്കൂട്ടറും FZ സീരീസ് ബൈക്കുകളുമാണ് യമഹ നിരയിലെ ജനപ്രിയ വാഹനങ്ങള്.