ഇന്ത്യന്‍ നിരത്തുകള്‍ കീഴടക്കാന്‍ ഹ്യുണ്ടായി വെന്യു എത്തി

രാജ്യത്തെ ആദ്യ കണക്റ്റഡ് എസ്‌യുവിയായ വെന്യു വിപണിയില്‍. പെട്രോള്‍, ഡീസല്‍ എന്നിങ്ങനെ രണ്ട് വകഭേദങ്ങളിലും ലഭ്യമാകുന്ന വെന്യുവിന്റെ വില 6.50 ലക്ഷം മുതല്‍ 11.10 ലക്ഷം വരെയാണ്.

1.2 ലിറ്റര്‍ ടര്‍ബോ പെട്രോള്‍ എഞ്ചിന് 6.50 ലക്ഷവും 1 ലിറ്റര്‍ ടര്‍ബോ പെട്രോള്‍ മോഡലിന് 8.21, 9.54, 10.60 എന്നിങ്ങനെയാണ് വില. ഡീസല്‍ മോഡലുകള്‍ക്ക് 7.75, 8.45, 9.80, 10.84 എന്നിങ്ങനെയാണ് വില. ബുക്കിംഗ് ആരംഭിച്ച ആദ്യദിനം തന്നെ 2000 ആളുകളാണ് വെന്യു ബുക്ക് ചെയ്തത്.

ഇലക്ട്രിക് സണ്‍റൂഫ്, വയര്‍ലെസ് ഫോണ്‍ ചാര്‍ജിങ്, എയര്‍ പ്യൂരിഫയര്‍, ക്രൂയിസ് കണ്‍ട്രോള്‍, റിയര്‍ എസി വെന്റ്, കോര്‍ണറിങ് ലാമ്പ് എന്നിവയെല്ലാം വെന്യുവിന്റെ സവിശേഷതകളാണ്.

വെന്യുവിന്റെ ഡീസല്‍ പതിപ്പില്‍ 1.4 ലിറ്റര്‍ ടര്‍ബോ എന്‍ജിന്‍ യൂണിറ്റ് 89 ബിഎച്ച്പി കരുത്തും 220 എന്‍എം ടോര്‍ഖും സൃഷ്ടിക്കും. ആറു സ്പീഡ് ഗിയര്‍ബോക്സാണ് ഉള്ളത്. രണ്ട് എയര്‍ ബാഗുകളാണ് ഉള്‍ക്കൊള്ളിച്ചിരിക്കുന്നത്.

യാത്രികരുടെ സുരക്ഷയ്‌ക്കും വാഹനത്തിന്റെ സെക്യൂരിറ്റിക്കും പ്രാധാന്യം നല്‍കിയാണ് വാഹനം നിര്‍മ്മിച്ചിരിക്കുന്നത്. സ്മാര്‍ട്ട് കണക്റ്റഡ് എസ്യുവി വെന്യുവിലെ പ്രധാന ആകര്‍ഷണമാണ് ബ്ലുലിങ്ക് കണക്റ്റിവിറ്റി ടെക്‌നോളജി. ഓട്ടോ ക്ലാഷ് നോട്ടിഫിക്കേഷന്‍, തല്‍സമയ ട്രാഫിക് അപ്‌ഡേറ്റുകള്‍, എമര്‍ജെന്‍സി അസിസ്റ്റ്, റോഡ് സൈഡ് അസിസ്റ്റ്, സ്റ്റോളന്‍ വെഹിക്കിള്‍ ട്രാക്കിങ് തുടങ്ങി 33 തരം ഫീച്ചറുകള്‍ ഈ സാങ്കേതികവിദ്യയില്‍ അടങ്ങിയിട്ടുണ്ട്.

മാരുതിയുടെ വിതാര ബ്രെസ, ഫോഡ് എക്കോസ്പോട്ട്, ടാറ്റാ നെക്സോണ്‍, മഹീന്ദ്ര എസ്യുവി 300 എന്നിവയ്‌ക്കാകും പുതിയ വെന്യു വിപണിയില്‍ എതിരാളിയാകുക.