വാഹനങ്ങള് മൂലമുള്ള അന്തരീക്ഷ മലിനീകരണം കുറയ്ക്കാനായി ഭാരത സര്ക്കാര് ആവിഷ്ക്കരിച്ച ഭാരത് സ്റ്റേജ് 6 നിലവാരത്തിലുള്ള രാജ്യത്തെ ആദ്യ ഇരുചക്ര വാഹനം പുറത്തിറക്കാനൊരുങ്ങി ഹോണ്ട. ജൂണ് 12 ന് ബിഎസ് 6 മോഡല് പുറത്തിറക്കുമെന്നാണ് കമ്പനി അറിയിച്ചിരിക്കുന്നത്.
രാജ്യത്തെ ജനപ്രിയ ഇരുചക്ര വാഹനങ്ങളില് ഒന്നായ ഹോണ്ട ആക്ടിവയുടെ ഏറ്റവും പുതിയ വകഭേദമായ 6 ജി മോഡലാണ് ബിഎസ് 6 എഞ്ചിനിലെത്തുകയെന്നാണ് ലഭ്യമാകുന്ന സൂചനകള്. ബിഎസ് 6 എഞ്ചിനിലേക്ക് മാറുന്നതിനോടൊപ്പം നിരവധി മാറ്റങ്ങള് ഉള്പ്പെടുത്തി കൊണ്ടാണ് ആക്ടിവ 6 ജി എത്തുന്നതെന്നാണ് റിപ്പോര്ട്ടുകള് വ്യക്തമാക്കുന്നത്.
നിലവില് ബിഎസ് 4 നിലവാരത്തിലുള്ള വാഹനങ്ങളാണ് ഇന്ത്യയിലുള്ളത്. 2020 ഏപ്രില് ഒന്ന് മുതല് ഇന്ത്യന് നിരത്തുകളിലെ വാഹനങ്ങള്ക്ക് ബിഎസ് 6 നിര്ബന്ധമാക്കും. അതോടെ വായു മലിനീകരണം ഗണ്യമായി കുറയും. രാജ്യത്തെ മുന് നിര കാര് നിര്മ്മാതാക്കള് ബിഎസ് 6 ലേക്ക് മാറിക്കൊണ്ടിരിക്കുന്നതിന് പിന്നാലെയാണ് ഇരുചക്ര വാഹനങ്ങളും ബിഎസ് 6 എഞ്ചിനിലേക്ക് മാറ്റുന്നത്.
