ഇനി ഊബര് നിങ്ങളെ തേടിയെത്തും ഡ്രൈവര് ഇല്ലാതെ തന്നെ. വോള്വോയും ഊബറും സംയുക്തമായി നിര്മ്മിച്ച സ്വയം നിയന്ത്രിത കാര് വാഷിംഗ് ടണ്ണില് പുറത്തിറക്കി. പ്രതിവര്ഷം പത്ത് ലക്ഷത്തോളം ആളുകളാണ് കാര് അപകടങ്ങളില് കൊല്ലപ്പെടുന്നത്. ഡ്രൈവര് ഇല്ലാതെ സ്വയം ഓടുന്ന വാഹനങ്ങള് നിരത്തിലെത്തിയാല് ഇത്തരം അപകടങ്ങള് ഒഴിവാക്കാന് സാധിക്കും എന്ന ലക്ഷ്യത്തോടെയാണ് വോള്വോയും-ഉൗബറും സെല്ഫ് ഡ്രൈവിംഗ് കാര് നിരത്തിലെത്തിക്കുന്നത്.
2016ലാണ് ഇരുകമ്പനികളും സ്വയം നിയന്ത്രിത കാറുകള് പുറത്തിറക്കാന് തീരുമാനിച്ചത്. 2020 ഓടെ വാഹനം ജനമധ്യത്തിലേക്ക് എത്തിക്കാനാണ് പദ്ധതി. കഴിഞ്ഞ മൂന്ന് വര്ഷത്തിനുള്ളില് നിരവധി സെല്ഫ് ഡ്രൈവിംഗ് പ്രോട്ടോട്ടൈപ്പ് പരീക്ഷിക്കാന് വോള്വോ- ഊബര് കൂട്ടുകെട്ടിന് സാധിച്ചിരുന്നു.
വോള്വോ കമ്പനിയുടെ അടിസ്ഥാന മോഡലില് ഊബര് വികസിപ്പിച്ചെടുത്ത ഓട്ടോണോമസ് ഡ്രൈവിംഗ് സംവിധാനം കൊണ്ടുവരാനാണ് ഇരുകമ്പനികളും ലക്ഷ്യമിടുന്നത്. ഊബറിന്റെ സെല്ഫ് ഡ്രൈവിംഗ് സിസ്റ്റം ഉപയോഗിച്ചാണ് വോള്വോ എക്സ്.സി 90 എസ്യുവി ഡ്രൈവര് ഇല്ലാതെ സ്വയം നിയന്ത്രിച്ച് ഓടുക.
വാഹനത്തിന് മുകളിലെ സെന്സര് വഴിയാണ് ഡ്രൈവര് ഇല്ലാതെ വാഹനം ഓടിക്കാന് സാധിക്കുന്നത്. ബ്രേക്കിംഗ്, സ്റ്റിയറിംഗ്, ബാറ്ററി എന്നിവ ബാക്ക്അപ്പ് സിസ്റ്റമായി വാഹനത്തില് നല്കിയിട്ടുണ്ട്. സെല്ഫ് ഡ്രൈവിംഗ് ആയതിനാല് പ്രവര്ത്തനങ്ങള്ക്ക് എന്തെങ്കിലും തകരാര് സംഭവിച്ചാല് ഈ ബാക്ക്അപ്പ് സിസ്റ്റം ഉപയോഗിച്ച് വാഹനം നിര്ത്താന് സാധിക്കും.