54 വർഷത്തെ ഇടവേളക്ക് ശേഷം റോയൽ എൻഫീൽഡ് റേസിംഗ് ട്രാക്കിലേക്ക് മടങ്ങിയെത്തുന്നു. പുതുതായി നിർമ്മിച്ച രണ്ട് കസ്റ്റം കോണ്ടിനെന്റൽ ജിടി 650 മോഡലുകളിലൂടെയാണ് എൻഫീൽഡ് ട്രാക്കിലേക്ക് തിരികെയെത്തുന്നത്. പഴയ കോണ്ടിനെന്റൽ ജിടി 650 ബൈക്കുകളെക്കാൾ 18.5 കിലോഗ്രാം ഭാരം കസ്റ്റം മോഡലിന് കുറച്ചിട്ടുണ്ട്. അതിനാൽ 26ശതമാനം അധികം കരുത്ത് ലഭിക്കുമെന്നാണ് കമ്പനി അവകാശപ്പെടുന്നത്.
എൻഫീൽഡിന്റെ യുകെയിലുള്ള ടെക്നിക്കൽ സെന്ററിലെ സ്റ്റാഫുകൾ രാത്രിയും അവധി ദിവസങ്ങളിലും അധിക ജോലിയെടുത്താണ് നോട് ടീ ജിടി വെർഷൻ 2.0 അണിയിച്ചൊരുക്കിയത്. ശേഷം 2019ലെ ബൈക് ഷെഡ് ഓട്ടോ ഷോയിൽ പുതിയ വാഹനം എൻഫീൽഡ് പുറത്തിറക്കുകയും ചെയ്തു.
ഇന്റര്സെപ്റ്റര് 650, കോണ്ടിനന്റല് ജിടി 650 എന്നീ മോഡലുകൾ നേരത്തെ തന്നെ എൻഫീൽഡ് പുറത്തിറക്കിയിരുന്നു. ഇവയിൽ നിന്ന് ചില മാറ്റങ്ങൾ വരുത്തിയാണ് റേസ് ട്രാക്കിൽ ചുവടുറപ്പിക്കാൻ കമ്പനി ഇറങ്ങുന്നത്. ഇതിന്റെ നിർമ്മാണത്തിന്റേതടക്കം വീഡിയോകൾ നേരത്തെ തന്നെ പുറത്തുവന്നിരുന്നു.
ഇരട്ട സൈലൻസറോടുകൂടിയ ബൈക്കിന് നവീകരിച്ച ഇഗ്നീഷൻ സിസ്റ്റമാണുള്ളത്. 5.75” എൽഇഡി യൂണിറ്റാണ് ഹെഡ് ലൈറ്റിലുള്ളത്. റോയൽ എൻഫീൽഡിന്റെ തന്നെ ഉടമസ്ഥതയിലുള്ള ഹാരിസ് പെർഫോമൻസ് നിർമ്മിച്ച ചെയിൻ സിസ്റ്റമാണ് വാഹനത്തിലുള്ളത്. ഇപ്പോൾ അവതരിപ്പിച്ചിരിക്കുന്ന വാഹനത്തിന്റെ എഞ്ചിൻ, ബോഡി അടക്കമുള്ള കാര്യങ്ങളിൽ നിരവധി മാറ്റങ്ങൾ വരുത്താൻ കമ്പനി തയ്യാറെടുക്കുന്നുവെന്നാണ് റിപ്പോർട്ടുകൾ.
ഇതിന് മുൻപ് 1965ലാണ് റോയൽ എൻഫീൽഡ് ബൈക്ക് റേസിംഗ് ട്രാക്കിലിറങ്ങിയത്. ജിപി5 250 പദ്ധതിയുമായി സഹകരിതച്ചായിരുന്നു അന്ന് എൻഫീൽഡ് വന്നത്. നിരത്തുകളിലെ കരുത്തനായ റോയൽ എൻഫീൽഡ് റേസിംഗ് ട്രാക്കിലിറങ്ങുന്നതു കാണാൻ ആകാംക്ഷയോടെ കാത്തിരിക്കുകയാണ് ബുള്ളറ്റ് ആരാധകർ.
