കണ്ണൂര്: മലയാള സിനിമാ താരം സനൂപ് സന്തോഷിന്റെ പേരില് വ്യാജ വാട്സ് ആപ്പ് അക്കൗണ്ടുണ്ടാക്കി നടികളെ വിളിച്ച മലപ്പുറം സ്വദേശി പിടിയില് .സനൂപിന്റെ പിതാവ് സന്തോഷ് നല്കിയ പരാതിയില് അന്വേഷണം നടത്തിയ കണ്ണൂര് സിഐ പ്രദീപ് കണ്ണിപ്പൊയിലാണ് പൊന്നാനി സ്വദേശിയായ രാഹുലിനെ പിടികൂടിയത്.
സഹോദരന് വിളിച്ചു സംസാരിക്കുന്നതായും മറ്റു നടികളുടെ നമ്പര് ചോദിച്ചതായും സനൂഷയോട് നടിമാര് പരാതിപ്പെട്ടതോടെയാണ് പരാതി നല്കാന് സനൂപിന്റെ അച്ഛന് തയ്യാറായത്. വാട്സ് ആപ്പില് സനൂഷയയോടൊപ്പമുള്ള പ്രൊഫൈല് ചിത്രമാണ് ഇയാള് കൊടുത്തിരിക്കുന്നത്.
അന്വേഷണത്തില് കോളുകള് വരുന്നത് മലപ്പുറം കേന്ദ്രീകരിച്ചാണ് കണ്ടെത്തിയതോടെയാണ് പോലീസ് സംഘം അന്വേഷണം മലപ്പുറത്തേക്ക് വ്യാപിപ്പിച്ചത്. നടികളോട് മോശമായി പെരുമാറിയതായി പരാതി ലഭിച്ചിട്ടില്ലെന്ന് സിഐ വ്യക്തമാക്കി. സനൂപിന്റെ പേരില് ഇയാള് അവസാനമായി വിളിച്ചത് മഞ്ജു പിള്ളയേയും റിമി ടോമിയേയുമാണ്.
