അടിമുടി മാറ്റങ്ങളുമായെത്തി വിപണി കീഴടക്കിയ ടാറ്റ മോട്ടോര്സ് വീണ്ടും പരീക്ഷണത്തിനൊരുങ്ങുന്നു. ജനപ്രിയ വാഹനമായ നെക്സോണിന്റെ വിജയത്തിനു പിന്നാലെ ഇലക്ട്രിക് മോഡല് വിപണിയിലെത്തിക്കാനാണ് ടാറ്റ ലക്ഷ്യമിടുന്നത്. 2019 ഡിസംബര് 16ന് ടാറ്റയുടെ ആദ്യ ഇലക്ട്രിക് എസ്യുവിയായ നെക്സോണ് പ്രദര്ശിപ്പിക്കും.
അടുത്ത വര്ഷം ജനുവരിക്കും മാര്ച്ചിനുമിടയില് ഇലക്ട്രിക് പതിപ്പ് ഇന്ത്യന് വിപണിയിലെത്തുമെന്ന് ടാറ്റ മോട്ടോഴ്സ് അറിയിച്ചു. ടാറ്റയുടെ സിപ്ട്രോണ് പവര്ട്രെയിന് സാങ്കേതിക വിദ്യ ഉപയോഗിക്കുന്ന ആദ്യ വാഹനമെന്ന നേട്ടവും നെക്സോണ് ഇവി സ്വന്തമാക്കി. 300 വോള്ട്ട് ഇലക്ട്രിക് മോട്ടോറാണ് വാഹനത്തിന് കരത്തേകുക. പരമാവധി 300 കിലോമീറ്റര് വേഗതയില് സഞ്ചരിക്കാന് കഴിയുന്ന വാഹനത്തിന് 15-17 ലക്ഷം രൂപയാണ് പ്രതീക്ഷിക്കുന്നത്.
ലിഥിയം-അയണ് സെല് ബാറ്ററിയാണ് വാഹനത്തില് ഉപയോഗിക്കുന്നത്. താപനില ക്രമീകരിക്കുന്നതിന്റെ ഭാഗമായി ലിക്വിഡ് കൂളിംഗ് സാങ്കേതിക വിദ്യയാണ് നെക്സോണ് ഇവിയില് ഉപയോഗിക്കുക. വാട്ടര് പ്രൂഫിംഗ്, ഡസ്റ്റ് പ്രൊട്ടക്ഷന് എന്നിവ ബാറ്ററിക്ക് സംരക്ഷണം നല്കും. മോട്ടോറിനും ബാറ്ററിക്കും 8 വര്ഷം വാറന്റിയാണ് കമ്പനി നല്കിയിരിക്കുന്നത്.
വാഹനത്തില് സാധാരണ ഇന്ധനം നിറക്കുന്ന ഭാഗത്തു തന്നെയാണ് ചാര്ജിംഗ് പോര്ട്ട് നല്കിയിരിക്കുന്നത്. 15 ആംപിയര് സോക്കറ്റ് ഉപയോഗിച്ച് ചാര്ജ് ചെയ്യാന് സാധിക്കും. അതിവേഗ ചാര്ജിംഗ് ഓപ്ഷനും പുതിയ നെക്സോണിലുണ്ടാകും. ഏത് പ്രതികൂല സാഹചര്യങ്ങളിലും കാലാവസ്ഥയിലും ഉപയോഗിക്കാന് അനുയോജ്യമായ വാഹനമാണ് നെക്സോണ് ഇവിയെന്ന് ടാറ്റ ഉറപ്പ് നല്കുന്നു. ഇതിന്റെ ഭാഗമായി മണാലിയില് നിന്ന് ലേയിലേക്കുള്ള ദുഷ്കരമായ റോഡിലൂടെ നെക്സോണ് ഇവി സഞ്ചരിക്കുന്ന വീഡിയോയും കമ്പനി പുറത്തുവിട്ടിരുന്നു.