വ്യക്തിപരമായ സന്തോഷമല്ല രാഷ്ട്രത്തിന്റെ താത്പര്യമാണ് പ്രധാനപ്പെട്ടതെന്ന് ചിന്തിച്ച പോരാളി. ഛത്രപതി ശിവാജി മഹാരാജാവിന്റെ കരുത്തനായ സേനാനായകൻ. താനാജി മാൻസുരെയുടെ വിക്രമ വീര്യത്തിന്റെ കഥപറയുന്ന താനാജി സിനിമയുടെ ട്രെയിലർ പുറത്തിറങ്ങി.
അജയ് ദേവ്ഗൺ താനാജിയായി എത്തുമ്പോൾ വില്ലനായി എത്തുന്നത് സെയ്ഫ് അലിഖാനാണ്. ഉദയ് ഭാൻ എന്ന യോദ്ധാവിന്റെ കഥാപാത്രമാണ് സെയ്ഫ് അഭിനയിക്കുന്നത്. മുഗളർക്ക് വേണ്ടി കൊണ്ടാന കോട്ട കാക്കുന്ന സൈനിക നേതാവാണ് ഉദയ് ഭാൻ.
ശിവാജിയായി അഭിനയിക്കുന്നത് ശരദ് കേൽക്കറാണ്.
1670 ൽ കൊണ്ടാന കോട്ട പിടിക്കാൻ താനാജി മാൽസുരെയുടെ നേതൃത്വത്തിൽ നടന്ന യുദ്ധമാണ് സിനിമയുടെ ഇതിവൃത്തം. ഈ യുദ്ധത്തിൽ മറാത്ത സൈനികർ കൊണ്ടാന കോട്ട പിടിച്ചടക്കുമെങ്കിലും ശിവാജിക്ക് വേദനയുണ്ടാക്കുന്ന മറ്റൊന്ന് ഈ യുദ്ധ വിജയത്തോടൊപ്പം സംഭവിക്കുന്നുണ്ട്. കൊണ്ടാന കോട്ട സിംഹഗഡ് എന്ന് അറിയപ്പെടുന്നത് ഈ സംഭവത്തിനു ശേഷമാണ്.
അടുത്തവർഷം ജനുവരി പത്തിനാണ് ചിത്രത്തിന്റെ റിലീസ്. ട്രെയിലർ മണിക്കൂറുകൾക്കുള്ളിൽ തരംഗമായിക്കഴിഞ്ഞു. എൺപത് ലക്ഷത്തിൽപരം വ്യൂസ് ഇതുവരെ ട്രെയിലറിന് ലഭിച്ചു കഴിഞ്ഞു.
