ജനപ്രിയ സ്കൂട്ടറായ ആക്ടീവയുടെ ബിഎസ് IV വാഹനങ്ങളുടെ നിർമ്മാണം ഹോണ്ട അവസാനിപ്പിച്ചു. ബിഎസ് VI എഞ്ചിനിലുള്ള വാഹനങ്ങൾ ഇറക്കുന്നതിന്റെ ഭാഗമായാണ് ബിഎസ് IV ആക്ടീവയുടെ ഉത്പാദനം നിർത്തിയത്. 2020 ഏപ്രിൽ മുതലാണ് രാജ്യത്ത് ബിഎസ് VI പ്രാബല്യത്തിൽ വരുന്നത്.
നിലവിൽ നിർമ്മാണം പൂർത്തിയായ മോഡൽ വിറ്റഴിക്കാനാണ് ഇപ്പോൾ കമ്പനി ലക്ഷ്യമിടുന്നത്. ബിഎസ് IV വാഹനങ്ങൾ ഡീലർഷിപ്പുകളിൽ സ്റ്റോക്കുണ്ട്. ഏപ്രിൽ മുതൽ വിൽക്കാനാവില്ല. അതിനാലാണ് ഉത്പാദനം നിർത്തി സ്റ്റോക്കുള്ളത് വിറ്റഴിക്കാൻ കമ്പനി തീരുമാനിച്ചത്.
ബിഎസ് VI നിലവാരത്തിലുള്ള ആക്ടിവ 125 ഇക്കഴിഞ്ഞ സെപ്റ്റംബർ മാസത്തിൽ ഹോണ്ട ഇന്ത്യന് വിപണിയിലെത്തിച്ചിരുന്നു. ഒക്ടോബർ മുതൽ വിതരണമാരംഭിച്ച ബിഎസ് IV മോഡലിന് മികച്ച പ്രതികരണമാണ് ലഭിക്കുന്നതെന്ന് കമ്പനി വ്യക്തമാക്കി. അതിനൊപ്പം 110 സിസിയില് ബിഎസ് VI എഞ്ചിനോടെ വൈകാതെ പുതിയൊരു പതിപ്പിനെ വിപണിയില് അവതരിപ്പിക്കുമെന്നും കമ്പനി അറിയിച്ചു.
