ജനപ്രിയ വാഹനമായ സെല്റ്റോസിന്റെ വിജയത്തിനു പിന്നാലെ രണ്ടാം വാഹനം നിരത്തിലിറക്കാനൊരുങ്ങി കിയ മോട്ടോര്സ്. ഇതിന്റെ ഭാഗമായി 2020 ഓട്ടോ എക്സ്പോയില് കിയ തങ്ങളുടെ ഏറ്റവും പുതിയ വാഹനമായ കാര്ണിവല് എംപിവി അവതരിപ്പിക്കും. ഒറ്റ നോട്ടത്തില് തന്നെ ടൊയോട്ട ഇന്നോവയോട് കിടപിടിക്കുന്ന വാഹനത്തേയാണ് കിയ അവതരിപ്പിക്കുന്നതെന്നാണ് ഇതിലൂടെ വ്യക്തമായിരിക്കുന്നത്.
വാഹനവുമായി ബന്ധപ്പെട്ട കൂടുതല് വിവരങ്ങള് നിര്മ്മാതാക്കള് തന്നെ ഔദ്യോഗികമായി പ്രഖ്യാപിച്ചിരിക്കുകയാണ്. കാര്ണിവലില് ഏഴ്, എട്ട്, ഒന്പത് സീറ്റ് കോണ്ഫിഗറേഷന് ലഭ്യമായിരിക്കും. പ്രീമിയം, പ്രസ്റ്റീജ്, ലിമോസിന് എന്നിങ്ങനെ മൂന്ന് വ്യത്യസ്ത പതിപ്പുകളിലാകും വാഹനം പുറത്തിറങ്ങുക. ഏഴ് സീറ്റര് പതിപ്പിന്റെ മധ്യനിരയില് സ്റ്റാന്റേര്ഡ് ക്യാപ്റ്റന് സീറ്റുകളും ലഭ്യമായിരിക്കും. യാത്രക്കാര്ക്ക് വ്യക്തിഗത ലെഗ് റെസ്റ്റ് സംവിധാനവും വാഹനം നല്കുന്നുണ്ട്.
രണ്ടാം നിരയില് വശങ്ങളിലേക്ക് തുറക്കുന്ന സ്ലൈഡിംഗ് ഡോറുകളാണ് ഘടിപ്പിച്ചിരിക്കുന്നത്. ഇത് വാഹനത്തിന് കൂടുതല് ആഡംബരം നല്കുന്നുണ്ട്. എട്ട് എയര്ബാഗുകള്, എബിഎസ്, ഇഎസ്സി, ഹില്സ്റ്റാര്ട്ട് അസിസ്റ്റ് കണ്ട്രോള്, റിവേഴ്സ് പാര്ക്കിങ് സെന്സറുകള്, ഫ്രണ്ട് പാര്ക്കിങ് സെന്സറുകള്, പ്രൊജക്ഷന് ഹെഡ്ലാമ്പ്, ഡിആര്എല്, ഫോഗ് ലാമ്പ്, 19 ഇഞ്ച് ഡയ്മണ്ട് കട്ട് അലോയി വീല്, എല്ഇഡി ടെയില് ലാമ്പ്, സ്കിഡ് പ്ലേറ്റ് എന്നിവയും കാര്ണിവലിന്റെ സവിശേഷതകളാണ്. കിയ എംപിവിയ്ക്ക് ഏകദേശം 26-30 ലക്ഷം രൂപ വിലവരെ പ്രതീക്ഷിക്കാം.
