തിരുവനന്തപുരം: ശ്രീകൃഷ്ണ ജയന്തിയുടെ ഭാഗമായി ബാലഗോകുലം ബാലസംസ്കാര കേന്ദ്രം ഏര്പ്പെടുത്തിയ ജന്മാഷ്ടമി പുരസ്കാരം ഡോ. വി. സുജാതയ്ക്ക് സമര്പ്പിച്ചു. അനന്തപുരം ബാങ്ക് ഓഡിറ്റോറിയത്തില് നടന്ന ചടങ്ങില് തിരുവനന്തപുരം മേയര് വി.വി. രാജേഷ് ഉദ്ഘാടനം നിര്വഹിച്ചു.
ബാലസംസ്കാര കേന്ദ്രം ചെയര്മാന് പി.കെ. വിജയരാഘവന് അധ്യക്ഷത വഹിച്ച ചടങ്ങില് ചലച്ചിത്ര സംവിധായകനും തപസ്യ സംസ്ഥാന പ്രസിഡന്റുമായ വിജയകൃഷ്ണന് ഡോ. വി. സുജാതയ്ക്ക് പുരസ്കാരം സമ്മാനിച്ചു. ബാലഗോകുലം സംസ്ഥാന അധ്യക്ഷന് കെ.എന്. സജികുമാര് പ്രശംസാപത്രം സമര്പ്പിച്ചു.
51,000 രൂപയും ശില്പവും പ്രശംസാപത്രവും അടങ്ങുന്നതാണ് ജന്മാഷ്ടമി പുരസ്കാരം. ശ്രീകൃഷ്ണ ജയന്തിയോടനുബന്ധിച്ച് ബാലസംസ്കാരം, സാമൂഹിക-സാംസ്കാരിക മേഖലകളിലെ ശ്രദ്ധേയമായ പ്രവര്ത്തനങ്ങള്ക്ക് നല്കുന്ന പുരസ്കാരമായാണ് ഇത് സമര്പ്പിച്ചത്.
തപസ്യ ഉപാധ്യക്ഷന് ആര്. പ്രസന്നകുമാര് ജന്മാഷ്ടമി സന്ദേശം നല്കി. ചടങ്ങില് ബാലഗോകുലം സംസ്ഥാന സമിതിയംഗം പി. ശ്രീകുമാര്, ജില്ലാ അധ്യക്ഷന് ജി.എസ്. ബാബുരാജ്, സ്വാഗതസംഘം ചെയര്മാന് വി. ലിജു, ബാലസമിതി കാര്യദര്ശി വി. അരുന്ധതി, എസ്. അനഘ, ആദിത്യന് എം. കുമാര് തുടങ്ങിയവര് പങ്കെടുത്തു.
ഡോ. എ.എം. ഉണ്ണികൃഷ്ണന് ചെയര്മാനും ഡോ. ജെ. പ്രമീളാദേവി, പി.കെ. വിജയരാഘവന്, പി. ശ്രീകുമാര്, എം. സത്യന് എന്നിവര് അംഗങ്ങളുമായ പുരസ്കാര നിര്ണയ സമിതിയാണ് ഡോ. വി. സുജാതയെ ജേതാവായി തെരഞ്ഞെടുത്തത്.
ശ്രീകൃഷ്ണ ജയന്തി ആഘോഷങ്ങളുടെ ഭാഗമായി സംഘടിപ്പിച്ച ചടങ്ങില് പുരസ്കാരം സമര്പ്പിച്ചത് ബാലസംസ്കാര പ്രവര്ത്തനങ്ങള്ക്കും സാംസ്കാരിക രംഗത്തെ ഇടപെടലുകള്ക്കും നല്കുന്ന അംഗീകാരമായി.
