മുംബൈ: രണ്ടായിരം രൂപയ്ക്ക് മുകളിലുള്ള എല്ലാ എടിഎം ഇടപാടുകള്ക്കും റിസര്വ്വ ബാങ്ക് ഒടിപി നിര്ബന്ധമാക്കി. എടിഎം/ ക്രെഡിറ്റ് കാര്ഡ് പിന് ഉപയോഗിച്ച് ഇത്തരം ഇടപാടുകള് പാടില്ലെന്നും ആര്ബിഐ വ്യക്തമാക്കി.
പേമെന്റ് കമ്പനികള്ക്കും പേമെന്റ് ഗേറ്റ്വേകള്ക്കുമായിആര്ബിഐ പുറത്തിറക്കിയ വിശദമായ മാര്ഗ രേഖയിലാണ് നിര്ദ്ദേശം. ഡിജിറ്റല് ഇടപാടുകളിലെ തട്ടിപ്പുകള് നിയന്ത്രിക്കുന്നതിനും ഇടപാടുകാരുടെ പണം സുരക്ഷിതമാക്കാനും ഉദ്ദേശിച്ചാണ് നിര്ദ്ദേശങ്ങള്. ഡിജിറ്റല് ഇടപാടുകള് നടത്തുമ്പോള് പേയ്മെന്റ് കമ്പനികള് എടിഎം പിന് ചോദിക്കാന് പാടില്ല. 2000 രൂപയ്ക്ക് മുകളിലുള്ള എല്ലാ ഇടപാടുകളും ഉറപ്പിക്കാന് ഒടിപി ഉപയോഗിക്കണം. പേമെന്റ് ഗേറ്റ്വേ കമ്പനികള്ക്കോ ഹാക്കര്മാര്ക്കോ ഇടപാടുകാരുടെ എടിഎം പിന് ലഭിക്കാനുള്ള അവസരം ഒഴിവാക്കുകയാണ് ഇതിലൂടെ ലക്ഷ്യം വെയ്ക്കുന്നത്.
ഇടപാടുകള് റദ്ദാക്കുമ്പോള് പണം മടക്കി നല്കുന്നതിനും കൃത്യമായ നിര്ദ്ദേശമുണ്ട്. ഏത് സ്രോതസില് നിന്നാണോ പണം എത്തിയത് അവിടേക്ക് തന്നെ പണം തിരിച്ചു നല്കണമെന്നാണ് നിര്ദ്ദേശം. വ്യാപാരികള്ക്ക് പ്രവേശിക്കാവുന്ന ഡേറ്റാ ബേസിലോ സെര്വ്വറിലോ മര്ച്ചന്റ് വെബ്സൈറ്റിലോ ഉപഭോക്താക്കളുടെ കാര്ഡ് വിവരങ്ങള് സൂക്ഷിക്കാന് പാടില്ലെന്നും നിര്ദ്ദേശമുണ്ട്.