ഇന്ന് അക്ഷയ തൃതിയ. ഭാരതീയ വിശ്വാസപ്രകാരം സര്വൈശ്വര്യത്തിന്റെ ദിനമാണ് അക്ഷയ തൃതീയ. വൈശാഖമാസത്തിലെ ശുക്ലപക്ഷത്തിലെ മൂന്നാമത്തെ തൃതീയയാണ് അക്ഷയ തൃതീയയായി കണക്കാക്കുന്നത്. ശുഭകാര്യങ്ങള്ക്ക് തുടക്കം കുറിക്കാന് ഉത്തമമായ മാസമാണ് വൈശാഖം.
അക്ഷയതൃതീയ നാളില് ചെയ്യുന്ന സദ്കര്മ്മങ്ങളുടെ ഫലം ക്ഷയിക്കില്ല എന്നാണ് പുരാതനകാലം മുതല്ക്കേയുള്ള വിശ്വാസം. പുതിയ കാര്യങ്ങള് തുടങ്ങാന് ഏറ്റവും ശുഭകരമായ ദിനമാണിത്. അക്ഷയ തൃതീയ ദിനത്തില് എന്ത് തുടങ്ങിയാലും പത്ത് മടങ്ങ് ഗുണം ലഭിക്കുമെന്നാണ് വിശ്വാസം. അന്നേ ദിവസം ദാനധര്മ്മങ്ങള് നടത്തുന്നതും പുണ്യമായി കരുതുന്നു.
മുഹൂര്ത്തം നോക്കാതെ ഏത് മംഗള കാര്യവും ചെയ്യാന് പറ്റിയ ദിവസമാണ് അക്ഷയ തൃതീയ. അന്നേ ദിവസം വിവാഹം, ഗൃഹപ്രവേശം, മറ്റ് മംഗളകാര്യങ്ങള് എല്ലാം നടത്താറുണ്ട്.
രാജ്യത്ത് ഏറ്റവുമധികം സ്വര്ണ വില്പ്പന നടക്കുന്ന ദിനമാണ് അക്ഷയതൃതീയ. കൊറോണ പ്രതിരോധത്തിനായി രാജ്യത്ത് ലോക്ക് ഡൗണ് പ്രഖ്യാപിച്ചിരിക്കുന്നതിനാല് സ്വര്ണക്കടകളെല്ലാം അടഞ്ഞു കിടക്കുകയാണ്. എന്നാല് കടകള് തുറക്കാന് കഴിയാത്തതിനാല് പകരം സംവിധാനം ഒരുക്കിയിരിക്കുകയാണ് വ്യാപാരികള്. ഓണ്ലൈനിലൂടെ സ്വര്ണം വാങ്ങാനുള്ള അവസരമാണ് ജ്വല്ലറികള് ഒരുക്കിയിരിക്കുന്നത്.
വാട്ട്സ് ആപ്പ് ഗ്രൂപ്പുകള് വഴിയും ഫോണ് വഴിയും ജ്വല്ലറികളുടെ വെബ്സൈറ്റ് വഴിയും ഓണ്ലൈന് ബുക്കിംഗിന് സൗകര്യമുണ്ട്. ലോക്ക് ഡൗണിന് ശേഷം ജ്വല്ലറികള് തുറക്കുമ്പോള് ബുക്ക് ചെയ്ത സ്വര്ണം ഉപഭോക്താക്കള്ക്ക് ലഭിക്കും.
ലോക്ക് ഡൗണും വിപണിയിലെ മാന്ദ്യവും കാരണം പ്രമുഖ വ്യാപാരികള് സ്വര്ണം ഗ്രാമിന് 50 രൂപ വരെ കുറച്ചാണ് അക്ഷയ തൃതിയ ദിനത്തില് വില്ക്കുന്നത്. ഗിഫ്റ്റ് വൗച്ചറുകളും ക്യാഷ് ബാക്ക് ഓഫറുകളും പലരും മുന്നോട്ട് വെയ്ക്കുന്നുണ്ട്. അക്ഷയ തൃതിയ ദിനത്തിലും സ്വര്ണ വില റെക്കോര്ഡ് ഉയരത്തിലാണ്.
