മുംബൈ: രാജ്യത്ത് ഏറ്റവും അധികം കൊറോണ കേസ്സുകള്‍ വന്നുകൊണ്ടിരിക്കുന്ന മുംബൈയില്‍ സ്ഥിതി പരിതാപകരം. രോഗികള്‍ നിലയ്കാതെ വന്നുകൊണ്ടിരിക്കുന്നതിനാല്‍ ഡോക്ടര്‍മാര്‍ പരിക്ഷീണിതരാണെന്ന വീഡിയോദൃശ്യങ്ങള്‍ സംസ്ഥാന സര്‍ക്കാറിനെ വെട്ടിലാക്കിയിരിക്കുകയാണ്. രോഗികളെ പ്രവേശിപ്പിക്കാനായി ആശുപത്രിയിലെ കിടക്കകളുടെ എണ്ണം കൂട്ടിയപ്പോള്‍ മതിയായ ജീവനക്കാരില്ലാത്തതാണ് വലിയ പ്രതിസന്ധി സൃഷ്ടിച്ചിരിക്കുന്നത്. ഡോക്ടര്‍മാര്‍ മുഖ്യമന്ത്രിക്ക് നല്‍കിയ പരാതികള്‍ക്ക് പരിഹാരമില്ലാതെ വന്നതോടെയാണ് ആശുപത്രിയിലെ ദുരിതങ്ങള്‍ മൊബൈലില്‍ പകര്‍ത്തി സമൂഹമാദ്ധ്യമങ്ങളിലൂടെ പ്രചരിപ്പിക്കേണ്ടിവന്നതെന്നും ഡോക്ടര്‍മാര്‍ പറയുന്നു. മുഖ്യമന്ത്രിക്ക് കത്തയച്ച ഡോക്ടര്‍മാര്‍ ജോലി സമയം പകുതിയാക്കണമെന്നും കൂടുതല്‍ ജീവനക്കാരെ നല്‍കണമെന്നും ആവശ്യപ്പെട്ടിരുന്നു. ഒപ്പം അതേ ആശുപത്രികളില്‍ ജീവനക്കാര്‍ക്ക് കൊറോണ ബാധിച്ചാല്‍ അവര്‍ക്കായി മാത്രം പ്രത്യേകം വാര്‍ഡ് സംവിധാനം ഒരുക്കണമെന്നും കത്തിലൂടെ ആവശ്യപ്പെട്ടിരുന്നു. എന്നാല്‍ ഒന്നിനും ഒരു മാസമായിട്ടും പരിഹാരം കാണാന്‍ സംസ്ഥാന സര്‍ക്കാറിനായിട്ടില്ല.
പ്രധാനപ്പെട്ട സ്വകാര്യ ആശുപത്രികള്‍ പോലും കൊറോണ രോഗികളെ വേണ്ടപോലെ പരിചരിക്കാനാകാതെ കഷ്ടപ്പെടുകടാണ്. കിംഗ് എഡ്വേര്‍ഡ് ആശുപത്രിയിലെ ദൃശ്യങ്ങള്‍ അമ്പരപ്പിക്കുന്നതാണ്. രോഗികള്‍ വെന്റിലേറ്ററില്‍ കിടന്ന് മരണത്തോട് മല്ലടിക്കുന്ന ദൃശ്യങ്ങളും ഡോക്ടര്‍മാര്‍ പുറത്തുവിടുന്നു. നിരവധി ആരോഗ്യപ്രവര്‍ത്തകര്‍ക്ക് കൊറോണ ബാധിച്ചതിനാല്‍ നഴ്‌സുമാരുടെ വലിയ കുറവും ഡോക്ടര്‍മാര്‍ ലീവെടുത്തുപോയതും അവസ്ഥ ഭീകരമാക്കിയിരിക്കുകയാണ്.
‘വ്യാപകമായി കൊറോണ ബാധിച്ചിരിക്കുന്ന മുംബൈയിലും പരിസരപ്രദേശങ്ങളിലും പരിശോധനകള്‍ ഫലപ്രദമല്ല. ആളുകള്‍ ലോക്ഡൗണിലും നിയന്ത്രണങ്ങള്‍ പലയിടത്തും പാലിക്കാന്‍ തയ്യാറായില്ല. പതിനായിരത്തിനടുത്ത് വിവിധ ഭാഷാ തൊഴിലാളികള്‍ മുംബൈ ബാന്ദ്ര റെയില്‍വേ സ്റ്റേഷന്‍ പരിസരങ്ങളില്‍ ഒത്തുകൂടി’ സംസ്ഥാന സര്‍ക്കാറിന്റെ കെടുകാര്യസ്ഥത പ്രതിപക്ഷമായ ബി.ജെ.പിയും മുന്‍ മുഖ്യമന്ത്രി ദേവേന്ദ്ര ഫഡ്‌നാവിസും ഇന്നലെത്തന്നെ എടുത്തു പറഞ്ഞിരുന്നു. വകുപ്പുകളുടെ ഏകോപനം പോലും നടത്താനാകാത്ത ശിവസേന-കോണ്‍ഗ്രസ്സ്-എന്.സി.പി. മന്ത്രിസഭക്കെതിരെ വ്യാപക പ്രതിഷേധമാണുയരുന്നത്.
