ന്യൂയോര്‍ക്ക്: ലോകകായിക വേദിയില്‍ തിരിച്ചുവരവിനൊരുങ്ങുന്ന ടെന്നീസ് ലോകത്തില്‍ സമ്മിശ്ര പ്രതികരണം. ന്യൂയോര്‍ക്കിലെ സ്ഥിരം വേദിയില്‍ അമേരിക്കയുടെ അഭിമാനമായ യു.എസ്. ഓപ്പണ്‍ ടെന്നീസ് നടത്തുമെന്നാണ് സംഘാടകരുടെ തീരുമാനം. ആഗസ്റ്റ് മാസമാണ് തീരുമാനമായിരിക്കുന്നത്. ഇതിനിടെ ലോക ടെന്നീസ് താരങ്ങള്‍ പലരും അമേരിക്കയിലെ കൊറോണ ബാധ ഭയന്ന് വരാന്‍ മടിക്കുകയാണ്. അമേരിക്കന്‍ വനിതാ താരമായ സെറീന വില്യംസ് യു.എസ്.ഓപ്പണ്‍ ഉടന്‍ നടത്തണമെന്ന ആവശ്യവുമായിട്ടാണ് രംഗത്തുള്ളത്. എന്നാല്‍ അമേരിക്കയ്‌ക്ക് പുറത്തുള്ള ഭൂരിഭാഗം താരങ്ങള്‍ക്കും യൂറോപ്പിലെവിടെയെങ്കിലും കളിക്കാനാണ് താല്‍പ്പര്യം.
നിലവിലെ പുരുഷ ഒന്നാം നമ്പര്‍താരം നൊവാക് ജോക്കോവിച്ചും റാഫേല്‍ നദാലും വനിതകളില്‍ ആഷ്‌ലീ ബാര്‍ട്ടിയും സിമോണ ഹാലെപ്പും അമേരിക്കയുടെ അന്തരീക്ഷം ഭയക്കുകയാണ്. കൊറോണ യൂറോപ്പില്‍ കുറഞ്ഞുവരുന്നതാണ് താരങ്ങളുടെ താല്‍പ്പര്യം മാറാന്‍ കാരണം. സംഘാടകരുടെ സ്വാര്‍ത്ഥതയാണ് യു.എസ്. ഓപ്പണ്‍ അമേരിക്കയില്‍ ത്തന്നെ നടത്തണമെന്ന വാശിക്ക് പിന്നിലെന്നാണ് താരങ്ങള്‍ പറയുന്നത്. യു.എസ്. ഓപ്പണ്‍ കഴിഞ്ഞാല്‍ 13 ദിവസങ്ങള്‍ക്കുള്ളില്‍ പാരീസില്‍ ഫ്രഞ്ച് ഓപ്പണ്‍ തീരുമാനിച്ചിരി ക്കുന്നതിനാല്‍ താരങ്ങള്‍ അതിനോടാണ് താല്‍പ്പര്യം പ്രകടിപ്പിച്ചിരിക്കുന്നത്. ആഗസ്റ്റ്മാസം 17ഓടെയാണ് ടെന്നീസ് മത്സരങ്ങളെല്ലാം പുനരാരംഭിക്കാന്‍ തീരുമാനിച്ചിരിക്കുന്നത്.
