ഇതിഹാസ കാവ്യമായ രാമായണം വേറിട്ട ശൈലിയിൽ

അമിഷ് അറിയപ്പെടുന്ന എഴുത്തുകാരനും , കോളമിസ്റ്റും, നയതന്ത്രജ്ഞനുമാണ് . ഐഐഎം കൊൽക്കത്തയിൽ നിന്ന് ബിരുദം കരസ്ഥമാക്കിയ അമിഷ് പൂർണ്ണമായും എഴുത്തിലേക്ക് തിരിയുന്നതിനു മുൻപ് പതിനാലു വർഷത്തോളം ധനകാര്യ വിഭാഗത്തിൽ പ്രവർത്തിച്ചു പോന്നു .

എഴുത്തിന്റെ  ലോകത്തേക്ക് അമിഷ് കാലെടുത്തുവെച്ചതു “ശിവ ട്രൈലോജി ” അഥവാ “ശിവ പുരാണം “എന്ന മൂന്ന് ഭാഗങ്ങളുള്ള പുസ്തകവുമായിട്ടായിരുന്നു. മെലൂഹയിലെ ചിരഞ്ജീവികൾ, നാഗന്മാരുടെ രഹസ്യം, വായുപുത്രന്മാരുടെ ശപഥം എന്ന് നാമകരണം ചെയ്ത ഈ മൂന്ന് ഭാഗങ്ങളും ഇറങ്ങിയപ്പോൾ തന്നെ വൻ ജനശ്രദ്ധ പിടിച്ചു പറ്റി . തുടർച്ചയായി ബെസ്റ്റ്‌സെല്ലിങ് ലിസ്റ്റിൽ ഇപ്പോഴും സ്ഥാനം പിടിച്ചിരിക്കുന്നു ഈ മൂന്ന് പുസ്തകങ്ങളും. അമിഷിന്റെ  വ്യത്യസ്തമായ രചനാ ശൈലിയും , സരളമായ ഭാഷയും , ആകാംഷ നിലനിർത്തുന്ന ഘടകങ്ങളും ഇവയെ മികവുറ്റതാക്കി.

വിജയകരമായ ഒന്നാമത്തെ സീരിസിന് ശേഷം അമിഷ് വായനക്കാർക്ക് മുന്നിൽ അവതരിപ്പിച്ചിരിക്കുന്നത് ഇതിഹാസ കാവ്യമായ രാമായണത്തിലെ ചില ഏടുകളാണ്. അഞ്ച് ഭാഗങ്ങൾ ഉള്ള ഈ സീരിസിൽ ആദ്യത്തെ മൂന്ന് ഭാഗങ്ങളായ ഇക്ഷ്വാകുവംശത്തിന്റെ  യുവരാജാവ്, സീത, രാവൺ എന്നിവയാണ് പുറത്തിറങ്ങിയത്. അമിഷിന്റെ  ആദ്യത്തെ പുസ്തകങ്ങൾക്ക് ലഭിച്ച അതേ സ്വീകാര്യതയാണ് ഇവയ്‌ക്കും ലഭിച്ചിരിക്കുന്നത് . ശിവ പുരാണം പോലെ തന്നെ രാമന്റെ  കഥകളും ബെസ്റ്റ്‌സെല്ലിങ് ലിസ്റ്റിൽ തുടർച്ചയായി ഇടംപിടിച്ചിരിക്കുന്നു .

ഇക്ഷ്വാകുവംശത്തിന്റെ  യുവരാജാവ് എന്ന ആദ്യം ഭാഗം പുരാണത്തിലെ രാമന്റെ  കഥയാണ് പറഞ്ഞു പോകുന്നത്. ഉത്തമ പുരുഷോത്തമനായ രാമനെ അമിഷ് ചിത്രീകരിച്ചിരിക്കുന്നത് നമ്മളിൽ ഒരാളെ പോലെ ഒരു സാധാരണ വ്യക്തിയായിട്ടാണ്. രാമനെ വായിക്കുമ്പോൾ വായനക്കാർക്ക് ഒരിക്കലും തങ്ങൾ വായിക്കുന്നത് ഇതിഹാസ കാവ്യത്തിലെ രാമനെയാണെന്ന് തോന്നുകയേ ഇല്ല.

സീത എന്ന രണ്ടാം ഭാഗം വർണ്ണിക്കുന്നത് സാക്ഷാൽ സീതാദേവിയെ തന്നെയാണ്. എന്നാൽ മേൽ പറഞ്ഞപോലെ സീതയെ ഒരു ദേവിയായി വായനക്കാർക്ക് ഒരിക്കലും അനുഭവപ്പെടില്ല. കൈവിട്ട് പോകേണ്ടിയിരുന്ന തന്റെ  രാജ്യത്ത്, ബുദ്ധിയും, ധൈര്യവും,രാജതന്ത്രങ്ങൾ മെനയാനുള്ള കൂർമത കൊണ്ടും സുസ്ഥിര ഭരണവും സമാധാനവും പുനഃസ്ഥാപിച്ച മിഥിലയിലെ ധീര വനിത.

രാവൺ എന്ന പേര് നൽകിയിരിക്കുന്ന മൂന്നാം ഭാഗം, അംഗവൈകല്യമുള്ള, ക്രൂരതയുടെ മുഖമുള്ള , ബുദ്ധിമാനായ യോദ്ധാവും , സമുദ്രങ്ങളിൽ കൂടി നടത്തപെടുന്ന ചരക്കു കച്ചവടങ്ങളുടെ അധിപനും, മുഖ്യ വ്യാപാരിയുമായ രാവണനെയാണ് വരച്ചു കാട്ടുന്നത് . നമ്മുടെ സങ്കല്പത്തിലുള്ള രാവണൻറ്റെ രൂപവുമായി വിദൂര സാമ്യം പോലും വായനക്കാർക്ക് തോന്നുകയില്ല എന്നതാണ് ഏറ്റവും അത്ഭുതം .

ഈ മൂന്ന് ഭാഗങ്ങളും വായനക്കാരെ ആകാംക്ഷയുടെ മുൾമുനയിൽ നിർത്തുകയും ത്രസിപ്പിക്കുകയും ചെയ്യുന്നു. നമ്മുടെ ചിന്തകളിൽ വരച്ചിട്ടിരിക്കുന്ന രാമനെയോ, സീതയെയോ , രാവണനെയോ ഈ കൃതികളിൽ നമുക്ക് കാണാൻ സാധിക്കില്ല .സാധാരണ ഒരു നോവൽ വായിക്കുന്ന പോലെ വായിച്ചു പോകാൻ സാധിക്കുന്ന മനോഹരമായ ആവിഷ്കാരം എന്ന് തന്നെ ഈ കൃതികളെ നമുക്ക് വർണ്ണിക്കാം . വായനക്കാരുടെ മനസ്സിൽ തന്റെ  സങ്കല്പത്തിലെ കഥാപാത്രങ്ങളെ വരച്ചു ചേർക്കാൻ അമീഷിനു സാധിച്ചിട്ടുണ്ട് എന്ന് സംശയലേശമന്യേ പറയാൻ സാധിക്കും.