ന്യൂഡല്‍ഹി: വിവിധ ഭാഷാ തൊഴിലാളികളുടെ മുഴുവന്‍ കണക്കുകളും സമര്‍പ്പിക്കാന്‍ സുപ്രീംകോടതിയുടെ നിര്‍ദ്ദേശം.കൊറോണയെ തുടര്‍ന്ന് വിവിധ സംസ്ഥാനങ്ങളിലേയ്‌ക്ക് തിരികെ എത്തിയ തൊഴിലാളികളുടെ കണക്കുകളും മറ്റ് സംസ്ഥാനങ്ങളില്‍ നിലവില്‍ കഴിയുന്ന തൊഴിലാളികളുടെ വിവരങ്ങളുമാണ് നല്‍കേണ്ടത്. എല്ലാ സംസ്ഥാനങ്ങളും കേന്ദ്രഭരണപ്രദേശങ്ങളും അതാത് സ്ഥലത്തെ നിലവിലെ അവസ്ഥയുടെ റിപ്പോര്‍ട്ടാണ് സമര്‍പ്പിക്കേണ്ടത്. എത്ര പേര്‍ സ്വന്തം സംസ്ഥാനങ്ങളില്‍ തിരികെ എത്തി എന്നതാണ് പ്രധാനമായും കോടതിയില്‍ നല്‍കേണ്ടത്.
എല്ലാ സംസ്ഥാനങ്ങളോടും സ്വന്തം സ്ഥലങ്ങളിലേയ്‌ക്ക് മടങ്ങിപോകാന്‍ ആഗ്രഹിക്കുന്ന തൊഴിലാളികളെ തിരികെ വിടണമെന്ന് നിര്‍ദ്ദേശിച്ചിരുന്നു. കേന്ദ്ര സര്‍ക്കാര്‍ ആവശ്യത്തിന് തീവണ്ടികള്‍ ലഭ്യമാക്കിയിട്ടും സംസ്ഥാനങ്ങള്‍ കാണിക്കുന്ന അലംഭാവത്തെ കോടതി വിമര്‍ശിച്ചു. സുപ്രീംകോടതി നേരിട്ട് ജൂണ്‍ മാസം ഒമ്പതാം തീയതിയാണ് നിര്‍ദ്ദേശം പുറപ്പെടുവിച്ചത്. 15 ദിവസത്തിനകം റിപ്പോര്‍ട്ട് സമര്‍പ്പിക്കണമെന്നാണ് പറഞ്ഞിരുന്നത്. എന്നാല്‍ മഹാരാഷ്‌ട്രയടക്കം വിവിധ സംസ്ഥാനങ്ങളില്‍ നിലവില്‍ നിരവധി വിവിധ ഭാഷാ തൊഴിലാളികള്‍ കുടുങ്ങിക്കിടക്കുന്നതായും സുപ്രീംകോടതി കണ്ടെത്തിയിരുന്നു. ജസ്റ്റിസ് അശോക് ഭൂഷന്റെ ബഞ്ചാണ് ഹര്‍ജികള്‍ പരിഗണിച്ചിരിക്കുന്നത്. ജസ്റ്റിസ് ആര്‍.എസ്.റെഡ്ഡി, എം.ആര്‍.ഷാ എന്നിവരും ബഞ്ചിലുണ്ട്.
