കോമഡി വൈൽഡ്‌ലൈഫ് ഫോട്ടോഗ്രാഫി അവാർഡുകൾ 2020

അനിശ്ചിതത്വം നിറഞ്ഞ ജീവിതത്തിൽ ഒരു നിമിഷത്തേക്കെങ്കിലും നമുക്ക് മറ്റുള്ളവരുടെ മുഖത്ത് പുഞ്ചിരി വിരിയിക്കാൻ ആയാൽ അതൊരു വലിയ കാര്യമാണ് . പല രീതിയിൽ മനുഷ്യർ ഇതിന് ശ്രമിക്കാറുണ്ട് . മൃഗങ്ങളുടെ ചിത്രങ്ങൾ എന്നും ആളുകളെ ആകർഷിക്കുന്ന ഒന്നാണ് ,അതിൽ ഇത്തിരി നർമ്മം കൂടി കലർന്നാലോ – ബഹുരസം .

കോവിഡ് എന്ന മഹാമാരി മനുഷ്യരെ വീട്ടുതടങ്കലിൽ ആക്കിയെങ്കിലും പക്ഷികളും മൃഗങ്ങളും അവരുടെ  ജീവിതം ആഘോഷിക്കുക തന്നെയാണ് .

കോമഡി വൈൽഡ്‌ലൈഫ് ഫോട്ടോഗ്രാഫി അവാർഡുകൾ എന്നത് ആറു വർഷം മുൻപ് പോൾ ജോയൻസോൺ ഹിക്ക്സ് ,ടോം സ്യുല്ലാം എന്ന് പേരുള്ള രണ്ടു വൈൽഡ്‌ലൈഫ് ഫോട്ടോഗ്രാഫർമാർക്ക് തോന്നിയ ആശയമാണ് . ദി ബോൺ ട്രീ ഫൗണ്ടേഷൻ എന്ന സംഘടനയോടൊപ്പം ചേർന്ന് , മനോഹരമായ ചിത്രങ്ങളിലൂടെ വന്യജീവികളെയും അവരുടെ ആവാസ വ്യവസ്ഥകളെയും സംരക്ഷിക്കുന്നതിനുള്ള ബോധവത്കരണം മനുഷ്യ ഹൃദയങ്ങളിൽ ജനിപ്പിക്കുക എന്ന ഉദ്ദേശത്തോടു കൂടിയാണ് ഇങ്ങിനെ ഒരു അവാർഡ് സംഘടിപ്പിച്ചിരിക്കുന്നത് . ഓരോ വർഷവും അനേകായിരം ചിത്രങ്ങളാണ് അവാർഡിനുവേണ്ടിയുള്ള അപേക്ഷകൾ ക്ഷണിക്കുമ്പോൾ ലഭിക്കാറുള്ളത് .

നമ്മളെല്ലാവരും കോവിഡ് മൂലം ഉള്ളിൽ അകപെട്ടപ്പോൾ , പക്ഷികളും മൃഗങ്ങളും കൂടുതൽ സ്വതന്ത്രരായി ജീവിക്കുന്നു എന്നും അതിനുള്ള തെളിവുകൾ നമ്മുടെ ചുറ്റും ഉള്ള പക്ഷിമൃഗാദികളുടെ കാഴ്ചകൾ തെളിയിക്കുന്നുവെന്നും സംഘാടകരിൽ ഒരാൾ അഭിപ്രായപ്പെട്ടു . 2020 ലേക്കുള്ള അപേക്ഷകൾ സ്വീകരിച്ചിരുന്ന അവസാന തീയതി ജൂൺ 30 ആയിരുന്നു . ഈ വർഷം ലഭിച്ച ചിത്രങ്ങളിൽ നിന്ന് തിരഞ്ഞെടുത്ത ഏറ്റവും മികച്ച ചിത്രങ്ങളിൽ ചിലത് സംഘാടകർ പുറത്തു വിട്ടിട്ടുണ്ട് .

1 . “വളരെ വൈകി റോബക്ക്, വളരെ വൈകി ” എന്ന അടികുറപ്പോടെ പ്രസിദ്ധീകരിച്ച  ©ആൽവിൻ ടാർക്ക്മീസ് എന്ന ഫോട്ടോഗ്രാഫറുടെ ചിത്രമാണ് . ഒരു മാനിനു നേരെ മറ്റൊരു മാന് നാക്ക് നീട്ടി നിൽക്കുന്ന ചിത്രമാണിത് .

2 .”വൗസ !” എന്ന അടികുറിപ്പോടെ പ്രസിദ്ധീകരിച്ച ©യാരോൺ ഷ്മിഡ് എന്ന ഫോട്ടോഗ്രാഫർ പകർത്തിയ ചിത്രമാണ് . ‘അമ്മ സിംഹത്തോടൊപ്പം ഇരിക്കുന്ന സിംഹകുട്ടിയുടെ മുഖത്തെ ഭാവമാണ് ഈ ചിത്രത്തെ മനോഹരമാക്കിയിരിക്കുന്നത് .

3 . “ഡൂയിങ് സാൻഡ് ഡാൻസ് ” എന്ന അടികുറിപ്പുള്ള ©ജാനറ്റ് മൈൽസ് എന്ന ഫോട്ടോഗ്രാഫർ പകർത്തിയ ചിത്രമാണ് മറ്റൊന്ന് . മലന്നു മണ്ണിൽ കിടക്കുന്ന കരടിയുടെ ചിത്രം തീർച്ചയായും നിങ്ങളുടെ ചുണ്ടിൽ പുഞ്ചിരി വിരിയിക്കും .

4 . “ലാഫിങ് സീ ഒട്ടർ ” എന്ന് പേര് നൽകിയ ചിത്രം പകർത്തിയിരിക്കുന്നത് ©ഡേവിഡ് ഡെസ് റോച്ചേഴ്സ് ആണ് . കടൽ ഒട്ടറുടെ ചിരിക്കുന്ന ഭാവത്തിലുള്ള ചിത്രമാണിത് .

5 . “കൺഫ്യൂസ്ഡ് ” എന്ന തലകെട്ടുള്ള നീർനായയുടെ ©ജോഹാം സിഗെസ്സൺ പകർത്തിയ ചിത്രമാണ് മറ്റൊന്ന് .