വെള്ളവസ്ത്രങ്ങൾ വളരെ കരുതലോടെ വേണം കൈകാര്യം ചെയ്യാൻ . അലക്കും തോറും നിറം മങ്ങുന്നതിനാൽ വെള്ളവസ്ത്രങ്ങൾ പലപ്പോഴും ഒരു തലവേദനയാണ് . നിറം മങ്ങി വെള്ള മഞ്ഞയായി മാറിയാൽ ഇട്ടു നടക്കുന്നവർക്ക് നാണക്കേട് മിച്ചവും . അലക്കുന്നതു കൊണ്ട് മാത്രമല്ല നിറം മങ്ങുന്നത് . നമ്മുടെ ശരീരത്തിലെ വിയർപ്പടിയുന്നതും നിറം മങ്ങാൻ കാരണമാണ് . നമ്മൾ ഉപയോഗിക്കുന്ന വിയർപ്പുസംഹാരികൾ , വിയർപ്പിൽ ഉണ്ടാകുന്ന പ്രോട്ടീനുമായി കൂടി കലരുമ്പോൾ ആണ് വസ്ത്രങ്ങളുടെ കക്ഷങ്ങളിലും മറ്റും മഞ്ഞ നിറം പടരുന്നത് .
വെള്ളവസ്ത്രങ്ങളിലെ മഞ്ഞ നിറം മാറ്റാൻ കഴിവുള്ള രണ്ടു വസ്തുക്കളാണ് ഹൈഡ്രജൻ പെറോക്സൈഡും ബേക്കിംഗ് സോഡയും . വസ്ത്രങ്ങളിൽ അടിഞ്ഞുകൂടിയിരിക്കുന്ന കറകളെ വലിച്ചെടുക്കാൻ രണ്ടു വസ്തുക്കൾക്കും ഉള്ള കഴിവാണ് ഫലം കാണിക്കുന്നത് .
ഹൈഡ്രജൻ പെറോക്സൈഡ് അലിഞ്ഞു കഴിയുമ്പോൾ അത് ഓക്സിജനെ പുറം തള്ളുന്നു . ഈ പ്രക്രിയ ആണ് കറകളെ വലിച്ചെടുക്കാൻ സഹായിക്കുന്നത് . ബേക്കിംഗ് സോഡയിലും ധാരാളം രാസപ്രവർത്തനങ്ങൾ നടത്തുന്ന ഘടകങ്ങൾ ഉള്ളതിനാൽ നല്ലൊരു കറ നിവാരിണിയായി പ്രവർത്തിക്കുന്നു . ക്ഷാര സ്വഭാവമുള്ള ബേക്കിംഗ് സോഡ മെഴുക്കു പോലുള്ള കറകളെ നീക്കം ചെയ്യാൻ ഉത്തമമാണ് .
മഞ്ഞ കറ നീക്കംചെയ്യാൻ ഹൈഡ്രജൻ പെറോക്സൈഡും ബേക്കിംഗ് സോഡയും ഉപയോഗിക്കുന്നതിനുള്ള രണ്ട് മികച്ച വഴികൾ ചുവടെ ചേർക്കുന്നു
ഒന്നര കപ്പ് ബേക്കിംഗ് സോഡ , രണ്ടു ടീസ്പൂൺ ഹൈഡ്രജൻ .പെറോക്സൈഡും, ഒന്നര ടീസ്പൂൺ ഉപ്പും കൂടി കലർത്തുക .വസ്ത്രങ്ങളിൽ കറ പുരണ്ട ഭാഗങ്ങളിൽ ഈ മിശ്രിതം പുരട്ടി അരമണിക്കൂറിന് വെക്കുക . ശേഷം നന്നായി തിരുമ്മിയതിന് ശേഷം വാഷിംഗ് മെഷീനിൽ ഇട്ട് അലക്കിയെടുക്കുക . ചൂട് വെള്ളം ഉപയോഗിക്കാതിരിക്കുന്നതാണ് നല്ലത് . എത്ര അധികം നേരം ഹൈഡ്രജൻ പെറോക്സൈഡ് ബേക്കിംഗ് സോഡാ മിശ്രിതത്തിൽ തുണി മുക്കി വെക്കാൻ പറ്റുമോ അത്രയധികം ഫലം ലഭിക്കുന്നതാണ്. അലക്കിയ തുണി വെയിലത്തിട്ടുണക്കിയാൽ കൂടുതൽ ഉചിതം .
പാത്രങ്ങൾ കഴുകാൻ ഉപയോഗിക്കുന്ന സോപ്പിന് എണ്ണ മയം വലിച്ചെടുക്കാനുള്ള കഴിവ് ഉണ്ട് . അതിനാൽ തന്നെ ഹൈഡ്രജൻ പെറോക്സൈഡിനും ബേക്കിംഗ് സോഡക്കും ഒപ്പം പാത്രം കഴുകുന്ന സോപ്പ് ഉപയോഗിക്കുന്നത് വെള്ളവസ്ത്രങ്ങളുടെ നിറം വീണ്ടെടുക്കാൻ സഹായിക്കും .
ഒരു കപ്പ് പാത്രം കഴുകുന്ന സോപ്പ് കലക്കിയ വെള്ളം , രണ്ടു കപ്പ് ഹൈഡ്രജൻ പെറോക്സൈഡും ചേർത്ത് മിശ്രിതം ഉണ്ടാക്കുക . കഴുകാനുള്ള വസ്ത്രത്തിൽ ഇത് തേച്ചു പിടിപ്പിച്ചതിന് ശേഷം കുറച്ചു നേരം വെക്കുക . അതിനു ശേഷം ബേക്കിംഗ് സോഡ ഉപയോഗിച്ച് നന്നായി ഉരച്ചു കഴുകിയതിനു ശേഷം മെഷീനിലിട്ടു അലക്കിയെടുക്കുക . വെയിലത്തിട്ടുണക്കിയാൽ കൂടുതൽ പ്രയോജനം ചെയ്യും .
വസ്ത്രങ്ങളുടെ വെണ്മ നിലനിർത്താൻ ഈ പൊടിക്കൈകൾ ഒന്ന് പരീക്ഷിച്ചു നോക്കാവുന്നതാണ് .
