ഔഷധ ഗുണങ്ങള് ഏറെയുള്ള ഒന്നാണ് ആര്യവേപ്പ്. വീടുകളില് ആര്യവേപ്പ് വളര്ത്തുന്നത് വീടിന്റെ ഐശ്വര്യത്തിനും ആരോഗ്യത്തിനും ഒരുപോലെ നല്ലതാണ.് അന്തരീക്ഷത്തിലേയ്ക്കു ഏറെ ശുദ്ധവായു പ്രദാനം ചെയ്യാന് കഴിവുള്ള ആര്യവേപ്പിന്റെ ഇലകളില് തട്ടി കടന്നു വരുന്ന കാറ്റ് ശ്വസിക്കുന്നതു പോലും ആരോഗ്യപ്രദമാണ്. ആരോഗ്യത്തിനു പുറമേ സൗന്ദര്യത്തിനും ചര്മരോഗങ്ങള്ക്കും ഒരുപോലെ ഗുണപ്രദമാണ് ആര്യവേപ്പ്. ആന്റി ബാക്ടീരിയല്, ആന്റിഓക്സിഡന്റ്, ആന്റിസെപ്റ്റിക്, ആന്റി മൈക്രോബയല് ഗുണങ്ങള് ഉള്ള ഒരേയൊരു ഔഷധ സസ്യമായ വേപ്പില എല്ലാ ദിവസവും രാവിലെ വെറും വയറ്റില് ചവച്ച് കഴിക്കുന്നത് ദഹനവ്യവസ്ഥയ്ക്കും ആരോഗ്യത്തിനും ഗുണപ്രദമാണ്.
ചര്മ്മത്തിലെ അണുബാധ മാറ്റാനും മുഖക്കുരുവിന് ശമനം നല്കാനും ചര്മത്തിലെ ചുളിവുകള് ഇല്ലാതാക്കാനും കണ്ണിനു താഴെയുള്ള കറുപ്പ് ഇല്ലാതാക്കാനും ആര്യവേപ്പ് ഉത്തമമാണ്. രോഗപ്രതിരോധ ശേഷി മെച്ചപ്പെടുത്തല്, ചര്മ്മത്തിന്റെ നിറം വര്ദ്ധിപ്പിക്കല്, ബലമുള്ള മുടി എന്നിവയ്ക്ക് വരെ വെറും വയറ്റില് ആര്യവേപ്പ് ഇല ചവച്ച് കഴിക്കുന്നത് ഗുണകരമാണ്. മീലിയേസീ സസ്യകുടുംബത്തിലെ ഒരു മരമാണ് ആര്യവേപ്പ്. ആര്യവേപ്പ് ഏകദേശം 30 മീറ്റര് വരെ ഉയരത്തില് പടര്ന്ന് വളരുന്നു. ഇല തണ്ടില് നിന്നും രണ്ട് വശത്തേക്കും ഒരുപോലെ കാണപ്പെടുന്നു. മറ്റു സസ്യങ്ങളെ അപേക്ഷിച്ച് വേപ്പിലയ്ക്ക് കയ്പ്പുരസമാണ്. പൂവിന് മഞ്ഞകലര്ന്ന വെള്ള നിറമാണുള്ളത്.
തടി, ഇല, കായ്, കായില് നിന്നും എടുക്കുന്ന എണ്ണ എന്നിവയാണ് ഔഷധനിര്മ്മാണത്തിനായി ഉപയോഗിക്കുന്ന പ്രധാന ഭാഗങ്ങള്. വേപ്പിന്റെ തണ്ട് പല്ല് വൃത്തിയാക്കുന്നതിനായി ഉപയോഗിക്കുന്നു. കൂടാതെ ത്വക്ക് രോഗങ്ങള്, സന്ധിവാതം, വൃണം, ചുമ, പ്രമേഹം തുടങ്ങിയ രോഗങ്ങളുടെ ഔഷധനിര്മ്മാണത്തിനായി വേപ്പിന്റെ പല ഭാഗങ്ങളും ഉപയോഗിക്കുന്നു. വേപ്പിന്റെ വിത്തില് നിന്നും ആട്ടിയെടുക്കുന്ന വേപ്പെണ്ണ പലതരം ഔഷധസോപ്പുകളുടേയും ചേരുവയില് ഉപയോഗിക്കുന്നു. വേപ്പിന് പിണ്ണാക്ക് ജൈവ വളമായി ഉപയോഗിക്കുന്നു. പയറുവര്ഗ്ഗങ്ങള്, നട്ട്സ് തുടങ്ങിവയ്ക്കൊപ്പം ആര്യവേപ്പിന്റെ ഏതാനും ഇലകള് കൂടി നിക്ഷേപിച്ചാല് അവയ്ക്ക് കീടബാധ ഏല്ക്കുകയില്ല. ദീര്ഘനാള് കേടു കൂടാതെയിരിക്കും. വേപ്പിന് തൈലം നല്ലൊരു കീടനാശിനിയായി ഔഷധത്തോട്ടങ്ങളില് ഉപയോഗിക്കാവുന്നതാണ്.
