വാശി പിടിക്കാത്ത കുട്ടികളില്ല. എന്തെങ്കിലുമൊക്കെ കാര്യങ്ങള്‍ക്കായി അവര്‍ നിരന്തരം വാശി പിടിക്കുന്നത് സാധാരണമാണ്. എന്നാല്‍ വളരുന്നതിനൊപ്പം അവരുടെ വാശിയും വളരുമ്പോഴാണ് സ്ഥിതി മോശമാകുന്നത് . ആദ്യം ചെറിയ ചെറിയ കാര്യങ്ങള്‍ക്കു വേണ്ടി തുടങ്ങുന്ന വാശി പിന്നെ കാര്യ സാധ്യത്തിനുള്ള എളുപ്പവഴിയായി കുട്ടികള്‍ തിരഞ്ഞെടുക്കും. ഏതെങ്കിലും സമയത്ത് രക്ഷിതാക്കള്‍ അതിനെ വിലക്കിയാല്‍ കുട്ടികള്‍ അവരോട് കയര്‍ക്കുകയും തുടര്‍ന്നു വീട്ടില്‍ വഴക്കുണ്ടാക്കുകയും ചെയ്യുന്നു. പിന്നീട് സ്‌കൂളില്‍ പോകുമ്പോള്‍ അധ്യാപകരോടും മറ്റുള്ള കുട്ടികളോടും അവര്‍ അങ്ങനെ തന്നെ പെരുമാറി തുടങ്ങും. ഇത്തരക്കാര്‍ക്ക് കൂട്ടുകാരും അടുത്ത ബന്ധങ്ങളും കുറവായിരിക്കും.
അവര്‍ ഒറ്റപ്പെടുന്നു അതുകൊണ്ടു തന്നെ പിന്നീടുള്ള അവരുടെ മാനസിക വളര്‍ച്ച അത് കാര്യമായി ബാധിക്കുന്നു. കുട്ടികളിലെ അമിത വാശി ചെറുപ്പത്തില്‍ തന്നെ നിയന്ത്രിക്കേണ്ടത് അത്യാവശ്യമാണ്.
ദുശ്ശാഠ്യവും വാശിയുമാണ് മിക്ക കുട്ടികളിലും കണ്ടുവരുന്നത്. മിക്ക കുട്ടികളും വാശിപിടിക്കുന്നതിന്റെ ആദ്യപടി ഭക്ഷണം ഉപേക്ഷിക്കലാണ്. ആവശ്യപ്പെടുന്ന കാര്യം സാധിക്കുന്നത് വരെ ഭക്ഷണം കഴിക്കില്ലെന്ന് പറഞ്ഞാണ് ഭൂരിഭാഗം കുട്ടികളും വീടുകളില്‍ കാര്യം സാധിക്കുന്നത് . ഇതു മാറ്റിയെടുക്കേണ്ടത് അത്യാവശ്യമാണ്.
ചെറുപ്പത്തില്‍ തന്നെ ശ്രദ്ധിക്കണം. അതില്‍ പ്രധാനമായും പരിഗണിക്കേണ്ടത് കുട്ടികള്‍ വളര്‍ന്നു വരുന്ന അന്തരീക്ഷമാണ്. തുടക്കം മുതല്‍ക്കേ വേണ്ടത്ര ശ്രദ്ധയും പരിഗണനയും കുട്ടികള്‍ക്ക് നല്‍കണം. ആവശ്യമായ പരിഗണനയും അര്‍ഹമായ സ്ഥാനവും കുട്ടികള്‍ക്ക് കിട്ടുന്നില്ല എന്ന തോന്നലാണ് മിക്ക കുട്ടികളിലും വാശി അതിരു കടക്കാന്‍ കാരണമാകുന്നത്. സ്‌നേഹത്തോടുള്ള സമീപനവും അവരെ പരിഗണിക്കുന്നതു എന്ന തോന്നല്‍ മാത്രം മതി കുട്ടികളിലെ വാശി നിയന്ത്രിക്കാന്‍. രക്ഷിതാക്കള്‍ കുട്ടികള്‍ക്കായി കുറച്ച് സമയം കണ്ടെത്തേണ്ടതും ചിലവഴിക്കേണ്ടതും അത്യാവശ്യമാണ് .
