സദ്ഗുരു എന്ന നാമത്തിൽ അറിയപ്പെടുന്ന ജഗ്ഗി വാസുദേവ് ദീർഘവീക്ഷണത്താലും ആത്മജ്ഞാനത്താലും മനുഷ്യർക്ക് തങ്ങളുടെ ഉള്ളിലുള്ള ദിവ്യത്വം അറിയാനും അനുഭവിക്കുവാനും പ്രകടിപ്പിക്കുവാനും വേണ്ടിയുള്ള മാർഗ്ഗനിർദ്ദേശങ്ങൾ നൽകുകയും സഹായിക്കുകയും ചെയ്യുന്ന മഹത്‌വ്യക്തികളിൽ ഒരാളാണ് .
ഭാരതത്തിൽ ഏറ്റവും സ്വാധീനമുള്ള അൻപതു വ്യക്തികളിൽ ഒരാളായ സദ്ഗുരു തന്റെ ആത്മീയ പരിപാടികളിലൂടെ ദശലക്ഷക്കണക്കിന് ആളുകൾക്കാണ് ജീവിതത്തിന്റെ ആഴങ്ങളിലേക്ക് കടന്നു ചെന്ന് സ്വയം പരിവർത്തനം നടത്താനുള്ള മാർഗ്ഗനിർദ്ദേശം നൽകിയിട്ടുള്ളത് .
കർണാടകയിലെ മൈസൂരിൽ താമസിച്ചിരുന്ന തെലുങ്ക് ഭാഷ സംസാരിക്കുന്ന കുടുംബത്തിൽ സെപ്റ്റംബർ മൂന്നിനാണ് അദ്ദേഹത്തിന്റെ ജനനം . പതിമൂന്നാമത്തെ വയസ്സ് മുതൽ യോഗ അഭ്യസിച്ചു പോന്നിരുന്ന അദ്ദേഹം , ബിരുദാനന്തര ബിരുദം എടുത്തതിന് ശേഷം ബിസിനസ്സ് രംഗത്തേക്ക് പ്രവേശിക്കുകയുണ്ടായി . ഇരുപത്തി അഞ്ചാമത്തെ വയസ്സിൽ തന്റെ ബിസിനസ്സ് സുഹൃത്തിനെ ഏല്പിച്ചു കൊണ്ട് ആത്മീയ ജ്ഞാനത്തിന് വേണ്ടി വിവിധ സ്ഥലങ്ങളിലേക്ക് യാത്ര ചെയ്യുകയും പിന്നീട് യോഗ അദ്ധ്യാപകനായി മാറുകയും ചെയ്തു .
ജീവനെ കുറിച്ചും ജീവിതത്തെക്കുറിച്ചും വ്യക്തമായ കാഴ്ചപ്പാടുള്ള സദ്ഗുരു തന്റെ ജീവിതം , മനുഷ്യരുടെ ശാരീരികവും മാനസികവും ആത്മീയമായ ക്ഷേമത്തിനും പൂർണ്ണമായ വ്യക്തതക്ക് വേണ്ടിയുള്ള മാർഗ്ഗ നിർദേശങ്ങൾ നൽകുവാൻ വേണ്ടി സമർപ്പിച്ചിരിക്കുന്നു . അദ്ദേഹം തന്റെ നേരെ വരുന്ന ഓരോ ചോദ്യങ്ങളേയും വ്യകതമായ മറുപടികളിലൂടെയും കാഴ്ചപ്പാടുകളിലൂടെയും ഉദാഹരണങ്ങൾ നിരത്തിയും നേരിടുന്നത് ഏവരിലും ആശ്ചര്യം ജനിപ്പിക്കാറുണ്ട് .
സദ്ഗുരുവിന്റെ വീക്ഷണത്തിൽ, വിശ്വാസവും യുക്തിയും, ആത്മീയതയും ശാസ്ത്രവും പവിത്രമായതിനാൽ ഭൗതികമായ കാഴ്ചപ്പാടിലൂടെ അവയെ വിഭജിക്കാനാവില്ല . ഓരോ വ്യകതികളും തങ്ങളുടെ ആത്മീയത തിരിച്ചറിയാതെ ഭൗതികമായ ജീവിതത്തിന്റെ സമ്മർദ്ദത്തിൽ പെട്ട് ഉഴലുന്നവരാണ് . സദ്ഗുരുവിനെ സംബന്ധിച്ചിടത്തോളം ജീവിതം ഒരനുഭവമാണ് അതിനാൽ തന്നെ ഓരോ വ്യക്തികൾക്കും തങ്ങളുടെ ഉള്ളിൽ നിറഞ്ഞു നിൽക്കുന്ന ആത്മീയ ജ്ഞാനത്തെ തിരിച്ചറിയാനുള്ള അവകാശമുണ്ട് .
അന്താരാഷ്‌ട്ര തലത്തിൽ പ്രശസ്തനായ പ്രഭാഷകനും , ഏറ്റവും കൂടുതൽ പുസ്തകങ്ങൾ വിറ്റു പോകുന്ന എഴുത്തുകാരൻ എന്ന നിലയിലും ലോകത്തെ ഏറ്റവും പ്രശസ്തമായ ഐക്യരാഷ്‌ട്രസഭയുടെ ആസ്ഥാനം തുടങ്ങി ലോകമെമ്പാടുമുള്ള വിവിധ പ്രശസ്ത സ്ഥാപനങ്ങളിൽ അദ്ദേഹത്തെ പ്രഭാഷകനായി ക്ഷണിച്ചിട്ടുണ്ട് .
ദക്ഷിണേന്ത്യയിലെ തമിഴ്‌നാട്ടിലെ കോയമ്പത്തൂർ നഗരത്തിൽ നിന്ന് നാൽപത് കിലോമീറ്റർ അകലെയുള്ള വെല്ലിയങ്കിരി പർവതനിരകളുടെ താഴ്‌വരയിൽ സ്ഥിതിചെയ്യുന്ന ലാഭേച്ഛയില്ലാതെ പ്രവർത്തിക്കുന്ന ഇഷ ഫൗണ്ടേഷൻ 1992 ലാണ് സദ്ഗുരു സ്ഥാപിച്ചത് . യോഗയുടെ മഹത്വം പ്രോത്സാഹിപ്പിക്കുന്നതിനായി ഇഷ ഫൗണ്ടേഷന്റെ നേതൃത്വത്തിൽ സ്ഥാപിച്ച ശിവഭഗവാന്റെ ലോകത്തിലെ ഏറ്റവും വലിയ അർദ്ധകായ പ്രതിമയായ ആദിയോഗി രൂപം സദ്ഗുരു രൂപകൽപന ചെയ്ത ഒന്നാണ് .
സദ്ഗുരു സമൂഹത്തിന് നൽകിയ സേവനങ്ങളെ മാനിച്ചു കൊണ്ട് രാജ്യം അദ്ദേഹത്തിന് 2017 ൽ പദ്മവിഭൂഷൺ നൽകി ആദരിക്കുകയുണ്ടായി .
