കാഴ്ചകൾക്കപ്പുറം വിസ്മയങ്ങൾ ഏറെയുള്ള നിരവധി പ്രദേശങ്ങൾ കൊണ്ട് സമ്പന്നമാണ് നമ്മുടെ ഭാരതം. യുനെസ്കോയുടെ ലോക പൈതൃക സ്മാരകങ്ങളുടെ പട്ടികയിൽ ഇടം നേടാൻ പോകുന്ന ത്രിപുരയിലെ ഉനകോടി എന്ന സ്ഥലത്തെ പരിചയപ്പെടാം. നിലവിൽ ആർക്കിയോളജിക്കൽ സർവ്വേ ഓഫ് ഇന്ത്യയാണ് ഈ പ്രദേശം സംരക്ഷിച്ചുവരുന്നത്. ഉനകോടിയെന്നാൽ ഒരു കോടിയിൽ നിന്ന് ഒന്ന് കുറവ് എന്നാണ്. ഈ പ്രദേശത്ത് നിങ്ങൾക്ക് 99,99,999 ( ഒരു കോടിയിൽ നിന്ന് ഒന്ന് കുറവ്) ദൈവരൂപങ്ങൾ കാണാൻ സാധിക്കും. ത്രിപുരയുടെ തലസ്ഥാനമായ അഗർത്തലയിൽ നിന്നും 178 കിലോമീറ്റർ ദൂരെയുള്ള ഈ സ്ഥലത്തിന് പറയാൻ കഥകളേറെയുണ്ട്.
ഹൈന്ദവ വിശ്വാസികൾക്കിടയിൽ കാലങ്ങളായി പ്രചരിച്ചുകൊണ്ടിരിക്കുന്നത് പ്രധാനമായും രണ്ട് കഥകൾ ആണ്.
ഒരിക്കൽ ശിവഭഗവാൻ ഉൾപ്പെടെ ഒരു കോടി ദേവി-ദേവന്മാർ ഒരുമിച്ച് കാശിക്ക് പോവുകയായിരുന്നു. പോകുന്ന വഴിയിൽ വിശ്രമിക്കാനായി അവർ തിരഞ്ഞെടുത്തത് ഇവിടെയായിരുന്നു. സൂര്യോദയത്തിന് മുന്നേ കാശിയിലേക്കുള്ള യാത്ര തുടരണം എന്നാണ് അവർ കരുതിയത്. എന്നാൽ ഉറക്കമുണർന്ന ശിവൻ മറ്റുള്ളവർ ഉറക്കത്തിൽ നിന്നും എഴുന്നേറ്റിട്ടില്ല എന്ന് മനസിലാക്കി. പറഞ്ഞ സമയത്ത് ഉറക്കം എഴുന്നേൽക്കാത്ത അവർ കല്ലായി പോകട്ടെ എന്ന് ശിവഭഗവാൻ ശപിക്കുകയായിരുന്നു. അങ്ങനെയാണ് ശിവനൊഴികെയുള്ള 99,99,999 ദേവി-ദേവന്മാരുടെ രൂപങ്ങൾ ഇവിടെ വന്നതെന്നാണ് വിശ്വാസം.
ആളുകൾക്കിടയിൽ പ്രചരിക്കുന്ന മറ്റൊരു കഥ പറയാം. ഒരു കൊല്ലപണിക്കാരന്റെ കഥ. കല്ലു എന്നായിരുന്നു ആ കൊല്ലപണിക്കാരന്റെ പേര്. ഒരിക്കൽ കല്ലുവിന് ഒരു ആഗ്രഹം. ശിവഭഗവാന്റെയും പാർവ്വതി ദേവിയുടെയും കൂടെ കൈലാസത്തിൽ താമസിക്കണം എന്നായിരുന്നു കല്ലുവിന്റെ ആഗ്രഹം. തന്റെ ആഗ്രഹം ശിവഭഗവാനെ അറിയിച്ചപ്പോൾ താൻ ഒരു പന്തയം വെക്കാമെന്നും അതിൽ വിജയിച്ചാൽ ആഗ്രഹം സാധിപ്പിച്ചുതരാം എന്നും ശിവഭഗവാൻ മറുപടി നൽകി. ഒറ്റ രാത്രി കൊണ്ട് ദേവി-ദേവന്മാരുടെ ഒരു കോടി രൂപങ്ങൾ നിർമിക്കാൻ ആയിരുന്നു ശിവഭഗവാൻ കല്ലുവിനോട് പറഞ്ഞത്. എന്നാൽ കല്ലു നിർമ്മിച്ച രൂപങ്ങൾ രാവിലെ എണ്ണിയപ്പോൾ 99,99,999 എണ്ണം ആണുണ്ടായത്. ഒരു കോടിയിൽ നിന്നും ഒന്ന് കുറവ് എന്നതിൽ നിന്നാണ് ഈ പ്രദേശത്തിന് ഉനകോടി എന്ന പേര് ലഭിച്ചത്.
വ്യത്യസ്ത കഥകൾ നിലനിൽക്കുന്നുണ്ടെങ്കിലും ഇന്നും ഐതിഹ്യകഥകൾ ഉറങ്ങുന്ന മണ്ണായി എല്ലാവരും കണക്കാക്കുന്ന പ്രദേശമാണ് ഉനകോടി. വെള്ളച്ചാട്ടത്തിന് സമീപത്തെ ഈ കൊത്തുപണികൾ വർണനകൾക്കും അപ്പുറമാണ്.
കല്ലിൽ കൊത്തിയതും കല്ലിൽ തീർത്തതുമായ നിരവധി രൂപങ്ങളിൽ വെച്ച് ഏറ്റവും പ്രധാനമായ ഒന്നാണ് 30 അടി ഉയരമുള്ള ശിവഭഗവാന്റെ രൂപം. ഉനകോട്ടീശ്വര കാല ഭൈരവ എന്ന പേരിലാണ് ഇത് അറിയപ്പെടുന്നത്. കൂടാതെ വിഷ്ണു, ഗണപതി, ദുർഗ്ഗ, ഹനുമാൻ തുടങ്ങീ നിരവധി ദേവി-ദേവന്മാരുടെ രൂപങ്ങളും നിങ്ങൾക്ക് കാണാൻ സാധിക്കും.
പച്ചപ്പുകൾക്കും വെള്ളച്ചാട്ടങ്ങൾക്കും ഇടയിൽ സ്ഥിതിചെയ്യുന്ന ഈ പ്രദേശം ഏഴാം നൂറ്റാണ്ടിനും ഒമ്പതാം നൂറ്റാണ്ടിനും ഇടയിൽ രൂപപ്പെട്ട ശൈവ തീർത്ഥാടന കേന്ദ്രമായിരുന്നു എന്നും പറയപ്പെടുന്നു. എട്ടാം നൂറ്റാണ്ടുമുതൽ പന്ത്രണ്ടാം നൂറ്റാണ്ട് വരെയുണ്ടായിരുന്ന പാൽ ഇറയുടെ സമയത്തെ ശൈവതീർത്ഥമായിരുന്നു ഇതെന്നും ഇക്കൂട്ടർ പറയുന്നു. അതേ സമയം ബുദ്ധസന്യാസിമാരുടെ കേന്ദ്രമായിരുന്നു ഇതെന്നും മറ്റുചിലർ അഭിപ്രായപ്പെടുന്നു.
ആസ്ടെക് സംസ്കാരങ്ങളുമായി സാമ്യമുള്ള രൂപങ്ങൾ ആണ് നിങ്ങൾക്കിവിടെ കാണാൻ സാധിക്കുക.
എല്ലാ വർഷവും ഏപ്രിൽ മാസത്തിൽ ഇവിടെ നടന്നുവരുന്ന ആഘോഷമാണ് അശോകാഷ്ടമി മേള.
യാത്രകളെയും കാഴ്ചകളെയും ഇഷ്ടപ്പെടുന്നവർ തീർച്ചയായും സന്ദർശിക്കേണ്ട ഒരു സ്ഥലം തന്നെയാണ് ഉനകോടി. പലർക്കും അപരിചിതമായ ഈ സ്ഥലം നിങ്ങളെ ഒരുപാട് കാലങ്ങൾ പിറകിലേക്ക് കൊണ്ടുപോകുമെന്ന് തീർച്ച. സന്ദർശകർ നിരവധി ഇവിടെ എത്താറുള്ളതിനാൽ അവർക്ക് വേണ്ടിയുള്ള എല്ലാ സൗകര്യങ്ങളും ഉറപ്പ് വരുത്താനും ഇവിടെ ആളുകൾ ഉണ്ട്.
