ഇലക്കറികള് ഭക്ഷണത്തില് നിത്യവും ഉള്പ്പെടുത്തുന്നത് ആരോഗ്യത്തിന് വളരെ നല്ലതാണ്. ചീര, മുരിങ്ങയില തുടങ്ങിയവ നമുക്ക് വീട്ടില് തന്നെ കൃഷി ചെയ്യാവുന്നതാണ്. ചീരയ്ക്കും മുരിങ്ങയിലയ്ക്കും പുറമേ പയറിന്റെ ഇല, മുളകിന്റെ ഇല എന്നിവയും കഴിക്കാറുണ്ട്. എന്നാല് ദിവസവും ഇവ ലഭിക്കണമെന്നില്ല. അതുപോലെ തന്നെ ഇലകള് എപ്പോഴും നല്ലത് ആയിരിക്കുകയുമില്ല. എന്നാല് പുറത്തു നിന്നും വാങ്ങിയ്ക്കുന്ന ഇലക്കറികളില് ഭൂരിഭാഗവും കീടനാശിനികള് തളിച്ചതായിരിക്കും. ഇവ കഴിക്കുന്നത് ആരോഗ്യത്തിന് വിപരീത ഫലമാണ് ഉണ്ടാക്കുന്നത്.
എന്നാല് ഇനി നിത്യവും നമുക്ക് ഇലക്കറി കഴിക്കാം മണ്ണോ, വളമോ, ചകിരിച്ചോറോ ഒന്നും ഇല്ലാതെ തന്നെ വളരെ എളുപ്പം നമുക്ക് വീട്ടില് ഉണ്ടാക്കിയെടുക്കാം. ഇതിനായി കുറച്ചു സമയം മാത്രം ചെലവഴിച്ചാല് മതി. ഇതിനായി ചെറുപയറോ വന്പയറോ എടുത്ത് നന്നായി കഴുകി വെള്ളത്തിലിട്ടു വെയ്ക്കുക. കഴിയുന്നതും തലേ ദിവസം രാത്രി ഇട്ടു വയ്ക്കുന്നതാണ് നല്ലത്. പിറ്റേ ദിവസം വെള്ളം ഒഴിവാക്കി ഒരു വെളുത്ത വൃത്തിയുള്ള തുണിയില് പൊതിഞ്ഞു വയ്ക്കുക. വൈകുന്നേരം ആകുമ്പോഴേക്കും ഇത് മുളച്ചു വരും.
മുളപ്പിക്കാന് വിത്ത് എടുക്കുമ്പോള് അവ നല്ലതാണോ എന്ന് പ്രത്യേകം ശ്രദ്ധിക്കണം. ഒരു ട്രേയില് വൃത്തിയുള്ള വെള്ളുത്ത തുണി വിരിച്ച് അതിലേയ്ക്ക് മുളപ്പിച്ച വിത്ത് നന്നായി പാകി കൊടുക്കുക. എന്നിട്ട് വെളളം തളിച്ചു കൊടുക്കുക. അഞ്ച് ദിവസത്തിനകം അത് വലുതായി വരും. ഇതിനായി വളത്തിന്റെ ആവശ്യമില്ല. ഇടയ്ക്കിടെ വെള്ളം തളിച്ചു കൊടുത്താല് മാത്രം മതി. വീട്ടില് എളുപ്പം ഉണ്ടാക്കാവുന്ന ഇതിന്റെ വേരുള്പ്പടെ നമുക്ക് ഉപയോഗിക്കാം. വളരെ സ്വാദിഷ്ടവും ആരോഗ്യകരവുമായ ഈ ഇലക്കറി നിത്യവും നമുക്ക് ഭക്ഷണത്തോടൊപ്പം ചേര്ക്കാവുന്ന ഒന്നാണ്.
