ചായ കുടിക്കാൻ എല്ലാവർക്കും ഇഷ്ടമാണ്. ചായയോടൊപ്പം ബിസ്ക്കറ്റ് കൂടി കിട്ടിയാലോ. വലിയ സന്തോഷമാകുമല്ലേ. എന്നാൽ ചായ ഗ്ലാസ് തന്നെ ബിസ്കറ്റ് ആയാൽ ആ സന്തോഷം ഇരട്ടിയാകും. അത്തരത്തിൽ പുതിയ സംവിധാനവുമായി എത്തിയിരിക്കുകയാണ് വിവേക് സഭാപതി എന്ന കച്ചവടക്കാരൻ.
ബിസ്ക്കറ്റ് ഗ്ലാസിലാണ് വിവേക് ചായക്കച്ചവടം നടത്തുന്നത്. കോൺ ഐസ്ക്രീം കപ്പുകൾ പോലെയാണ് വിവേകിന്റെ ബിസ്ക്കറ്റ് ഗ്ലാസുകൾ. തമിഴ്നാട്ടിലെ മധുരയിൽ മേലവാസി തെരുവിലാണ് വിവേക് ചായ വിൽപ്പന നടത്തുന്നത്. പ്ലാസ്റ്റിക് നിരോധനം വന്നതോടെ പ്ലാസ്റ്റിക് ഗ്ലാസുകൾ ഒഴിവാക്കാൻ എന്താണ് മറ്റൊരു വഴി എന്ന ആലോചനയാണ് ഇത്തരമൊരു പുതിയ ആശയത്തിലേക്ക് വിവേകിനെ എത്തിച്ചത്.
ഹൈദരാബാദിലുള്ള തന്റെ ഒരു സുഹൃത്തുമായി ആലോചിച്ചാണ് വിവേക് ബിസ്ക്കറ്റ് കപ്പ് നിർമ്മിച്ചത്. 60 മില്ലീ മീറ്റർ ചൂട് ചായ 10 മിനിട്ട് വരെ ഈ ഗ്ലാസിൽ സൂക്ഷിക്കാം. 20 രൂപയാണ് ഒരു ചായയുടെ വില. ബിസ്ക്കറ്റ് ഗ്ലാസ് മാത്രമായും ലഭിക്കും. 15 രൂപയാണ് ബിസ്ക്കറ്റ് ഗ്ലാസിന്റെ വില.
