ഭര്‍ത്താവ് ഭാര്യയ്‌ക്കും ഭാര്യ ഭര്‍ത്താവിനും സമ്മാനം കൊടുക്കുന്നത് സാധാരണമാണ്. തൊണ്ണൂറ് ശതമാനം സ്ത്രീകളും സമ്മാനമായി ആഭരണവും വസ്ത്രവും ഇഷ്ടപ്പെടുന്നവരാണ്. അതുകൊണ്ടു തന്നെ വിലകൂടിയ ആഭരണങ്ങളും വസ്ത്രങ്ങളും ആയിരിക്കും മിക്ക പുരുഷന്മാരും ഭാര്യമാര്‍ക്ക് വിവാഹ സമ്മാനമായി നല്‍കുന്നത്. എന്നാല്‍ അതിലും വലിയ സമ്മാനങ്ങള്‍ നല്‍കുന്നവരും കുറവല്ല. ഭാര്യയുടെ പേരില്‍ വീടും സ്ഥലവും വാങ്ങുന്നവരുമുണ്ട്. എന്നാല്‍ ഇവിടെ ഒരു ഭര്‍ത്താവ് തന്റെ നേര്‍പ്പാതിയ്‌ക്ക് വിവാഹ സമ്മാനമായി ചന്ദ്രനില്‍ സ്ഥലം വാങ്ങി കൊടുത്തിരിക്കുകയാണ്.
പാക്സ്വദേശിയായ സുഹൈബ് അഹമ്മദാണ് വിവാഹ സമ്മാനമായി തന്റെ ഭാര്യയായ മഹിതയ്‌ക്ക് വേണ്ടി ഒരു വ്യത്യസ്ത സമ്മാനം നല്‍കിയത്. ചന്ദ്രനിലെ സി ഓഫ് വേപ്പര്‍ എന്ന ഭാഗത്താണ് നാല്‍പത്തിയഞ്ച് ഡോളര്‍ വില കൊടുത്ത് ഇന്റര്‍നാഷണല്‍ ലൂണാര്‍ ലാന്‍ഡ് രജിസ്റ്ററില്‍ നിന്നും ഭാര്യയ്‌ക്കാായി സ്ഥലം വാങ്ങിയത്. അന്തരിച്ച ബോളിവുഡ് താരം സുശാന്ത് സിംഗ് രജപുത് ഇന്റര്‍നാഷണല്‍ ലൂണാര്‍ ലാന്‍ഡ് രജിസ്റ്ററില്‍ നിന്നും സീ ഓഫ് മസ്‌കോവി എന്ന സ്ഥലം വാങ്ങിയിരുന്നു. അതു കണ്ടാണ് തന്റെ ഭാര്യയ്‌ക്കായി താനും ചന്ദ്രനില്‍ സ്ഥലം വാങ്ങിയത് എന്ന് സുഹൈബ് അഹമ്മദ് പറഞ്ഞു.
2018 ല്‍ സുശാന്ത് ചന്ദ്രനില്‍ സ്ഥലം വാങ്ങിയത് വലിയ ചര്‍ച്ചയ്‌ക്ക് ഇടയാക്കിയിരുന്നു. ആകാശത്തെ വിസ്മയ കാഴ്ചകള്‍ കാണുന്നതിനു വേണ്ടി ആഡംബര ടെലിസ്‌കോപ്പും തന്റെ ഫ്‌ളാറ്റില്‍ അദ്ദേഹം വച്ചിട്ടുണ്ടായിരുന്നു. ആരെയും അമ്പരപ്പിക്കുന്ന അല്ലെങ്കില്‍ വിസ്മയിപ്പിക്കുന്ന ഒരു വിവാഹ സമ്മാനമാണ് സുഹൈബ് നല്‍കിയത്. ഈ വിവാഹ സമ്മാനത്തിന്റെ കഥ കേട്ട് ഇനിയും എത്ര ഭര്‍ത്താക്കന്മാര്‍ തങ്ങളുടെ ഭാര്യയ്‌ക്കായി ഇത്തരത്തിലുള്ള വില കൂടിയ സമ്മാനങ്ങള്‍ വാങ്ങിക്കൂട്ടുമെന്നു കണ്ടറിയേണ്ടതാണ്.