യുഎഇയിൽ പ്രതിദിന കൊറോണ രോഗബാധിതരുടെ എണ്ണം തുടർച്ചയായ മൂന്നാം ദിവസവും ആയിരം കടന്നു.

യുഎഇയിൽ ഇരുപത്തിനാല് മണിക്കൂറിനിടെ 1008 പേർക്ക് കൂടി പുതുതായി കൊറോണ  സ്ഥിരീകരിച്ചതായി ആരോഗ്യ–രോഗപ്രതിരോധ മന്ത്രാലയം അറിയിച്ചു.ഇതോടെ ആകെ രോഗബാധിതരായവരുടെ  എണ്ണം 89,540 ആയി.92,000 ത്തിലേറെ പേർക്കാണ് കഴിഞ്ഞ 24 മണിക്കൂറിനിടെ പരിശോധന നടത്തിയത്.രാജ്യത്ത് ഇതുവരെ 90 ലക്ഷത്തിലേറെ പേർക്ക് രോഗ പരിശോധന നടത്തിതായി അധികൃതർ പറഞ്ഞു. 882 പേർ കൂടി സുഖംപ്രാപിച്ചു. ഇതോടെ  രോഗമുക്തി നേടിയവരുടെ എണ്ണം 78,819  ആയി ഉയർന്നു.2 പേർ കൂടി മരിച്ചതോടെ ആകെ മരണസംഖ്യ 409.നിലവിൽ  ചികിത്സയിലുള്ളവർ–10,312. ഇത് നാലാം തവണയാണ് പ്രതിദിന രോഗബാധിതരുടെ എണ്ണം ആയിരം കടക്കുന്നത്.രാജ്യത്ത് അടുത്ത ദിവസങ്ങളിലായി രോഗികളുടെ എണ്ണം കൂടാൻ കാരണം സുരക്ഷാ മുൻകരുതലുകൾ അവഗണിക്കുന്നതാണെന്ന് അധികൃതർ വ്യക്തമാക്കി.

സാമൂഹിക അകലം പാലിക്കാതിരിക്കുക , മാസ്ക് ധരിക്കാതിരിക്കുക തുടങ്ങിയ നിയമലംഘനങ്ങൾ വ്യാപകമായി നടന്നുവരുന്നു.എല്ലാവരും സുരക്ഷാ മുൻകരുതലുകൾ പാലിക്കണം. സാമൂഹിക അകലം പാലിക്കുകയും കൂട്ടായ്മകളും സംഗമങ്ങളും ഒഴിവാക്കുകയും വേണമെന്നും അധികൃതർ  നിർദേശിച്ചു. ഓഗസ്റ്റ് 10ന് ശേഷം അഞ്ച് മടങ്ങ് രോഗികൾ വർധിച്ചതായി ആരോഗ്യ മന്ത്രാലയം വക്താവ് ഡോ.ഫരീദ അൽ ഹൊസനി അറിയിച്ചിരുന്നു.ഇതിൽ 88% പേർക്കും രോഗം ബാധിച്ചത് പാർട്ടികൾ, അനുശോചന പരിപാടികൾ തുടങ്ങിയ കൂട്ടായ്മകളിൽ നിന്നും ക്വാറന്റീൻ പ്രോട്ടോകോൾ ലംഘിച്ചതു മൂലവുമാണെന്ന് വ്യക്തമാക്കി. നിയമലംഘനങ്ങൾ ശ്രദ്ധയിൽപ്പെട്ടാൽ ദുബായ് കൺസ്യൂമർ ആപ്പ് വഴിയോ  600545555 എന്ന നമ്പരിലോ, Consumerrights.ae വെബ്സൈറ്റ് സന്ദർശിച്ചോ വിവരം അധികൃതരെ അറിയിക്കണം.