ഭഗവാന്റെ വിശ്വരൂപ ദര്‍ശനം പതിനെട്ട് ദിവസം മാത്രം ലഭിക്കുന്ന കേരളത്തിലെ ഏക ക്ഷേത്രമാണ് പിറവം കക്കാട് ശ്രീപുരുഷമംഗലം ശ്രീകൃഷ്ണ ക്ഷേത്രം. മഹാഭാരതവും കുരുക്ഷേത്രയുദ്ധവുമായി വളരെ അടുത്തു കിടക്കുന്ന ക്ഷേത്രമാണിത്. മഹാഭാരത കഥയിലെ പതിനെട്ടു ദിവസം നീണ്ടു നിന്ന കുരുക്ഷേത്ര യുദ്ധത്തിലെ ഭഗവാന് ശ്രീ കൃഷ്ണന്റെ വിശ്വരൂപ ഭാവമാണ് ക്ഷേത്രത്തില്‍ പ്രതിഷ്ഠിച്ചിരിക്കുന്നത്. ശ്രീകൃഷ്ണ ഭഗവാന്റെ വിശ്വരൂപ ദര്‍ശനത്തിനായി നിരവധി വിശ്വാസികള്‍ ക്ഷേത്രത്തിലെത്താറുണ്ട്. നൂറ്റാണ്ടുകള്‍ പഴക്കമുള്ളതും ഏറെ ചരിത്ര പ്രാധാന്യമുളളതുമായ ഈ ക്ഷേത്രം എറണാകുളം ജില്ലയില്‍ പിറവത്തിനടുത്ത് കക്കാട് എന്ന സ്ഥലത്താണ് സ്ഥിതി ചെയ്യുന്നത്. വര്‍ഷത്തില്‍ ധനു മാസം ഒന്നു മുതല്‍ പതിനെട്ടു വരെയാണ് ശ്രീപുരുഷമംഗലം ശ്രീകൃഷ്ണ ക്ഷേത്രത്തിലെ ഭഗവാന്റെ വിശ്വരൂപ ദര്‍ശനം.
കുരുക്ഷേത്രയുദ്ധത്തില്‍ ഓരോ ദിവസവും സംഭവിച്ച കാര്യങ്ങളെ ഓര്‍മ്മിപ്പിക്കുന്ന തരത്തിലുള്ള ചടങ്ങുകളാണ് പതിനെട്ട് ദിവസവും ക്ഷേത്രത്തില്‍ നടത്തുന്നത്. യുദ്ധ ദിവസങ്ങളില്‍ ഭഗവാന് വിശ്വദര്‍ശന രൂപം വഴി പാണ്ഡവരുടെ ദുഖങ്ങള്‍ പരിഹരിച്ച് ധര്‍മ്മം പുനസ്ഥാപിക്കുന്നു. ഇതില്‍ ഒരു ദിവസം ക്ഷേത്രത്തിലെത്തി പ്രാര്‍ത്ഥിച്ചാല്‍ വേണ്ട കാര്യങ്ങള്‍ സാധിക്കുമെന്നാണ് വിശ്വാസം. കൂടാതെ ഈ ദിവസങ്ങളില്‍ ക്ഷേത്രത്തിലെത്തുന്നവരുടെ പ്രശ്‌നങ്ങളും ബുദ്ധിമുട്ടുകളും ഭഗവാന് അതുപ്പോലെ തീര്‍ത്തുകൊടുക്കുന്നു എന്നാണ് വിശ്വസിക്കപ്പെടുന്നത്. ദദ്ധന്യം എന്ന പ്രത്യേക നിവേദ്യമാണ് ഈ പതിനെട്ട് ദിവസങ്ങളിലും ഭഗവാന് സമര്‍പ്പിക്കുന്നത്.
മഹാഭാരത യുദ്ധപ്പുറപ്പെടുന്നതിനു മുന്‍പ് ദിവസവും ഭഗവാന് ഇതു കഴിച്ചിരുന്നു എന്നാണ് വിശ്വാസം. കൂടാതെ ഇതു കഴിച്ചാല്‍ ഏതൊരു രോഗത്തേയും പ്രതിരോധിക്കാനുള്ള ശക്തി ലഭിക്കുമെന്നാണ് വിശ്വാസം. ഏകദിന വിശ്വരൂപ പൂജയാണ് ക്ഷേത്രത്തിലെ ഏറ്റവും പ്രസിദ്ധമായ പൂജ. ഒരു ദിവസം ഒരാള്‍ക്ക് മാത്രമാണ് ഈ പൂജ ചെയ്യുവാന്‍ സാധിക്കുക. ഈ പൂജ കഴിച്ചാല്‍ ജീവിതത്തിലെ ഏതു ബുദ്ധിമുട്ടും മാറും എന്നാണ് വിശ്വാസം. ലക്ഷ്മിനാരായണപൂജ., കുടുംബൈശ്വര്യ പൂജ, താമരമൊട്ടില്‍ നെയ്യ് നിറമുള്ള ഹവനം, വിദ്യാഗോപാല മന്ത്രാര്‍ച്ചന, പാല്‍ പായസം, പഴം പഞ്ചസാര, വെണ്ണ നിവേദ്യം, കദളിപ്പഴം, കദളിപഴമിട്ട പാല്‍പായസം എന്നിവയാണ് ക്ഷേത്രത്തിലെ മറ്റു പ്രധാന വഴിപാടുകള്‍.
Comments