രാജസ്ഥാനിലെ അഭനേരി ഗ്രാമത്തിൽ ഉള്ള മനോഹരമായ കിണറാണ് ചന്ദ് ബയോറി . പതിമൂന്ന് നിലകളിലായി ത്രികോണാകൃതിയിൽ നിർമ്മിച്ച പടികൾ ഉള്ള ആഴമേറിയ കിണറാണ് ചന്ദ് ബയോറി . ഈ കിണറിന്റെ നിർമ്മാണ ശൈലി ആരെയും അതിശയിപ്പിക്കുന്നതും അമ്പരപ്പിക്കുന്നതുമാണ് .
പുരാതന കാലഘട്ടങ്ങളിൽ നിർമ്മിച്ച പടികൾ ഉള്ള കിണറുകളിൽ , ഇന്നും നിലനിൽക്കുന്ന ഭാരതത്തിലെ ഏക കിണറായിരിക്കും ചന്ദ് ബയോറി . നികുംഭ രാജവംശത്തിൽ ഉള്ള ചന്ദ എന്ന മഹാരാജാവ് പണികഴിപ്പിച്ച കിണറാണ് ചന്ദ് ബയോറി . 1200 – 1300 വർഷം വരെ പഴക്കമുള്ള ഈ കിണർ താജ് മഹലിനും , ഖജുരാഹോ ക്ഷേത്രങ്ങൾക്കും , ചോള ക്ഷേത്രങ്ങൾക്കും മുൻപ് തന്നെ നിർമ്മിച്ചിട്ടുള്ളതാണ് .ബയോറി എന്നതിന്റെ അർത്ഥം പടികൾ ഉള്ള കിണർ എന്നാണ് അതിനാൽ തന്നെ പണികഴിപ്പിച്ച രാജാവിന്റെ നാമത്തിലാണ് ഈ കിണർ അറിയപ്പെടുന്നത് .
19.5 മീറ്റർ ആഴത്തിലുള്ള കിണറിന്റെ മൂന്ന് വശങ്ങളിൽ ആയി ഒരേ ആകൃതിയിൽ ഉള്ള പടികൾ നിർമ്മിച്ചിരിക്കുന്നു . കുത്തനെ നിൽക്കുന്ന ത്രികോണാകൃതിയിൽ ഉള്ള പടികൾ ചരിഞ്ഞു മാത്രം മുകളിലേക്ക് കയറുകയും ഇറങ്ങുകയും ചെയ്യാൻ പാകത്തിനാണ് നിർമ്മിച്ചിരിക്കുന്നത് . അതായത് നേരെ കുത്തനെ മുകളിലേക്ക് കയറാനോ ഇറങ്ങാനോ സാധിക്കില്ല . കിണറിന്റെ ആഴം പരിഗണിച്ചു കൊണ്ട് സുരക്ഷയെ കരുതി ആയിരിക്കും ഈ മാതൃകയിൽ പടികൾ നിർമ്മിച്ചിട്ടുള്ളത് .
കിണറിന്റെ നാലാമത്തെ വശത്തായി ഒന്നിലധികം നിലകളിലായി തൂണുകൾ ഉള്ള ഇടനാഴികൾ നിർമ്മിച്ചിരിക്കുന്നു . ഇതിൽ രണ്ട് മട്ടുപ്പാവുകൾ കിണറിന്റെ വശത്തേക്ക് തള്ളിയാണ് നിൽക്കുന്നത് . ഇവിടെ മഹിഷാസുരമർദ്ദിനിയുടെയും ഗണപതി ഭഗവാന്റെയും വിഗ്രഹങ്ങൾ പ്രതിഷ്ഠിച്ചിരിക്കുന്നു .കൂടാതെ ഉറങ്ങുന്ന ഭാവത്തിൽ ഉള്ള മഹാവിഷ്ണുവിന്റെ പ്രതീകവും ഇവിടെ സ്ഥാപിച്ചിട്ടുണ്ട് .
പതിമൂന്ന് നിലകളിലായി മൂവായിരത്തിയഞ്ഞൂറ് പടികൾ ഉള്ള ഈ കിണർ താഴേക്ക് ചെല്ലും തോറും ഇടുങ്ങിയതാവുന്നു . ഒറ്റ രാത്രി കൊണ്ട് നിർമ്മിച്ചതാണീ പടികൾ എന്നാണ് നാടോടിക്കഥകളിൽ പറയുന്നത് . കിണറിലേക്ക് ഇറങ്ങാൻ ഉപയോഗിച്ച അതെ പടികൾ ഉപയോഗിച്ച് തന്നെ ആർക്കും തിരിച്ചു കയറാനാവില്ല എന്നും പറയപ്പെടുന്നു .
രാജസ്ഥാനിലേക്ക് ഒരു യാത്ര പ്ലാൻ ചെയ്യുന്നുണ്ട് എങ്കിൽ ഒട്ടനവധി മനോഹരമായ കാഴ്ചകൾ സമ്മാനിക്കുന്ന ചന്ദ് ബയോറി കാണാൻ മറക്കേണ്ട .
