തിരുവനന്തപുരം: സെക്രട്ടേറിയറ്റ്, ക്ലിഫ് ഹൗസ്, ആശുപത്രികൾ, സ്കൂളുകൾ എന്നിവിടങ്ങളിലേക്ക് തുടർച്ചയായി വ്യാജ ബോംബ് ഭീഷണി സന്ദേശങ്ങൾ അയച്ചെന്ന കേസിൽ തമിഴ്‌നാട് സ്വദേശി ശരത് സുബ്രഹ്മണ്യനെ തിരുവനന്തപുരം സിറ്റി സൈബർ പോലീസ് കസ്റ്റഡിയിലെടുത്തു. ഇയാൾക്കെതിരെ കേരളത്തിൽ മാത്രം 102 കേസുകളുണ്ടെന്നാണ് റിപ്പോർട്ട്.
തമിഴ്‌നാട് ആന്റി ടെററിസ്റ്റ് സ്‌ക്വാഡ് (എടിഎസ്) ആണ് ശരത്തിനെ ആദ്യം പിടികൂടിയത്. ഒന്നര മാസം മുമ്പ് ചെന്നൈയിലെത്തിയ ഇയാളെ മറ്റൊരു കേസുമായി ബന്ധപ്പെട്ടാണ് അറസ്റ്റ് ചെയ്തത്. തമിഴ്‌നാട് മുൻ മുഖ്യമന്ത്രി എം.കെ. സ്റ്റാലിന്റെ ഭാര്യയുടെ മോർഫ് ചെയ്ത ചിത്രം പ്രചരിപ്പിച്ച കേസിലായിരുന്നു നടപടി.
ഈ കേസുമായി ബന്ധപ്പെട്ട് വിശദമായി ചോദ്യം ചെയ്തപ്പോഴാണ് കേരളത്തിലെ വിവിധ സ്ഥാപനങ്ങൾക്കും പൊതുസ്ഥലങ്ങൾക്കും നേരെ വ്യാജ ബോംബ് ഭീഷണി സന്ദേശങ്ങൾ അയച്ചതുമായി ബന്ധപ്പെട്ട വിവരങ്ങൾ പുറത്തുവന്നതെന്നാണ് റിപ്പോർട്ട്. തുടർന്ന് തിരുവനന്തപുരം സിറ്റി സൈബർ പോലീസ് ഇയാളെ കസ്റ്റഡിയിലെടുക്കുകയായിരുന്നു.
അമേരിക്കയിലിരുന്നും ഭീഷണി സന്ദേശങ്ങൾ
സോഫ്റ്റ്‌വെയർ എൻജിനീയറായ ശരത് സുബ്രഹ്മണ്യൻ അമേരിക്കയിൽ താമസിച്ചിരുന്ന കാലത്തും ഇ-മെയിൽ വഴി ഭീഷണി സന്ദേശങ്ങൾ അയച്ചിരുന്നതായി പോലീസ് വ്യക്തമാക്കിയെന്നാണ് റിപ്പോർട്ട്. സെക്രട്ടേറിയറ്റും ക്ലിഫ് ഹൗസും ഉൾപ്പെടെയുള്ള പ്രധാന കേന്ദ്രങ്ങൾക്കു പുറമേ ആശുപത്രികൾക്കും സ്കൂളുകൾക്കും നേരെയും സന്ദേശങ്ങൾ അയച്ചതായാണ് വിവരം.
ഭാര്യ ഉപേക്ഷിച്ചുപോയതിനെത്തുടർന്നുള്ള നിരാശയാണ് വ്യാജ ബോംബ് ഭീഷണികൾക്ക് പിന്നിലെന്നാണ് പ്രാഥമിക വിവരം.
