കണ്ടുമടുത്ത ഇടങ്ങളിലേക്ക് അല്ല, നിങ്ങൾ കാണാൻ കൊതിക്കുന്ന സ്ഥലങ്ങളിലേക്ക് എത്തിച്ചേരുമ്പോൾ ആണ് എന്തൊക്കെയോ നേടിയ ഒരു തോന്നൽ നമുക്കുണ്ടാകുക. അങ്ങനെയുള്ള ഇടങ്ങളിലും പ്രകൃതിയുടെ മടിത്തട്ടിലേക്കുള്ള യാത്രകൾ നമുക്ക് പുത്തൻ ഉണർവ് തന്നെയായിരിക്കും സമ്മാനിക്കുക. കേരള-തമിഴ്നാട് അതിർത്തിയിലെ കൊളുക്കുമലയെ കുറിച്ചുള്ള വിശേഷങ്ങൾ നോക്കാം. തമിഴ്നാട്ടിലെ തേനി ജില്ലയിലെ ബോഡിനായ്‌ക്കനൂർ മുനിസിപ്പാലിറ്റിയിലാണ് കൊളുക്കുമലയുടെ യഥാർത്ഥ സ്ഥാനം.
ആകാശം മുട്ടി നിൽക്കുന്ന മലനിരകളും തേയിലത്തോട്ടങ്ങളും നിറഞ്ഞ കൊളുക്കുമലയെ ഭൂമിയിലെ ഉയരം കൂടിയ സ്വർഗം എന്ന് തന്നെ വിശേഷിപ്പിക്കാം. ലോകത്തിലെ ഏറ്റവും ഉയരം കൂടിയ തേയിലത്തോട്ടം എന്ന വിശേഷണവും ഈ മലയ്‌ക്ക് സ്വന്തം. സമുദ്രനിരപ്പിൽ നിന്നും 8000 അടി ഉയരത്തിലാണ് കൊളുക്കുമലയുള്ളത്. ലാലേട്ടൻ പറയുന്ന പോലെ ഉയരം കൂടുന്തോറും ചായയുടെ രുചി കൂടുമെന്നത് ഒരു സത്യമാണെന്ന് നിങ്ങൾക്ക് ഇവിടം സന്ദർശിച്ചാൽ മനസിലാകും.
1930ൽ ബ്രിട്ടീഷുകാർ സ്ഥാപിച്ച കൊളുക്കുമല തേയില എസ്റ്റേറ്റ് ഇന്നും പ്രവർത്തിക്കുന്നുണ്ട്. പരമ്പരാഗത രീതിയിലാണ് ഇപ്പോഴും ഇവിടെ പ്രവർത്തനങ്ങൾ നടക്കുന്നത്. ഇപ്പോഴത്തെ ഉടമസ്ഥർ കോട്ടഗുഡി പ്ലാന്റേഷൻ ആണ്.
‘മേക്ക് യുവർ ടീ’ എന്ന പരിപാടിയിലൂടെ ഇല നുള്ളുന്നത് മുതൽ ചായ ഉണ്ടാക്കുന്നത് വരെയുള്ള പ്രവർത്തനങ്ങൾ പുറമെ നിന്നുള്ളവർക്ക് പഠിക്കാവുന്നതാണ്.
മൂന്നാറിൽ നിന്നും ഏകദേശം 32 കിലോമീറ്റർ ദൂരമാണ് കൊളുക്കുമലയിലേക്ക് ഉള്ളത്. ജീപ്പുകൾ വഴി മാത്രമാണ് ഇവിടെ എത്താൻ സാധിക്കുക.
പ്രകൃതി ഭംഗിയെ ഇത്ര നന്നായി ഒപ്പിയെടുക്കുന്ന മറ്റൊരു സ്ഥലവും ഭൂമിയിൽ ഇല്ല എന്ന് തന്നെ തോന്നിപ്പോകും. പകൽ സമയത്തും രാത്രി സമയത്തും മഞ്ഞുമൂടിയ മലനിരകൾ നിങ്ങൾക്ക് മറക്കാനാവാത്ത കാഴ്ചകൾ ആയി മാറുമെന്നത്‌ തീർച്ച.
മീശപ്പുലിമല, തിപ്പാടമല എന്നിവ കൊളുക്കുമലയ്‌ക്ക് സമീപമാണ്.
Comments