കോഴിക്കോട് : രാഷ്‌ട്രീയ പ്രതിസന്ധികൾ വരുമ്പോൾ കേരളത്തിൽ ഇസ്ലാമോഫോബിയ പരത്തുന്നത് സിപിഎമ്മിന്റെ നയമാണെന്ന് ജമാ-അത്തെ-ഇസ്ലാമി കേരള അമീർ എം ഐ അബ്ദുൽ അസീസ് . സിപിഎം സംസ്ഥാന സെക്രട്ടറി ജമാ അത്തെയ്‌ക്കെതിരെ നടത്തിയ പ്രസ്താവനയോട് പ്രതികരിക്കുകയായിരുന്നു അബ്ദുൽ അസീസ് .
തദ്ദേശ, നിയമസഭാ തെരഞ്ഞെടുപ്പുകൾക്ക് മുന്നോടിയായി കേരളത്തിൽ വർഗീയ ചേരിതിരിവുകൾ സൃഷ്ടിക്കാനാണ് സിപിഎം ശ്രമിക്കുന്നത് .ഇതിന് പാർട്ടി കനത്ത വില നൽകേണ്ടി വരും.
രാഷ്‌ട്രീയ പ്രതിസന്ധി ഉണ്ടാകുമ്പോഴെല്ലാം ഇസ്ലാമിനെയും,മുസ്ലീങ്ങളെയും അപരസ്ഥാനത്ത് നിർത്തുകയാണ് സിപിഎം ചെയ്യുന്നത് . അങ്ങേയറ്റം അഴിമതിയിൽ കുളിച്ചു നിൽക്കുന്ന പിണറായി സർക്കാരിന്റെ സർട്ടിഫിക്കറ്റ് ആർക്കും ആവശ്യമില്ല .
2006,2011 എന്നീ കാലങ്ങളിൽ നടന്ന നിയമസഭാ തെരഞ്ഞെടുപ്പിലും ,2009 ലെ ലോക്സഭാ തെരഞ്ഞെടുപ്പിലും ജമാ അത്തെ ഇസ്ലാമി പിന്തുണച്ചത് എൽ ഡി എഫിനെയാണ് . അതുകൊണ്ട് തന്നെ മുൻ കാലങ്ങളിൽ ജമാ അത്തെയുമായി രാഷ്‌ട്രീയ ധാരണയുണ്ടാക്കിയിട്ടില്ലെന്ന് പറഞ്ഞ സിപിഎമ്മിന്റെ പ്രസ്താവന പരിഹാസ്യമാണെന്നും അദ്ബുൽ അസീസ് പറഞ്ഞു.
