പുറത്തിറങ്ങുന്ന മിക്ക ആളുകളുടെയും പ്രധാന പ്രശ്‌നമാണ് അതിശക്തമായ വെയില്‍. ഇതിന്റെ ചൂടേറ്റ് മുഖം വാടുന്നതും മുഖത്ത് കരിവാളിപ്പ് വരുന്നതും സ്ത്രീകളെ സംബന്ധിച്ചിടത്തോളം ഏറെ വിഷമമുണ്ടാക്കുന്ന ഒരു കാര്യം തന്നെയാണ്. അതുകൊണ്ടു തന്നെ പുറത്തു പോകുമ്പോള്‍ സണ്‍സ്‌ക്രീന്‍ ഉപയോഗിക്കുന്നത് ചര്‍മത്തിന് ഏറെ ഗുണം ചെയ്യുന്നു. ഇത് അതിശക്തമായ സൂര്യ താപത്തില്‍ നിന്ന് ചര്‍മ്മത്തെ സംരക്ഷിക്കുകയും ചെയ്യുന്നു. സൗന്ദര്യ സംരക്ഷണത്തിന്റെ ഭാഗം കൂടിയായ സണ്‍സ്‌ക്രീന്‍ മുഖത്തിനു സംരക്ഷണം നല്‍കാന്‍ വേണ്ടിയാണ് ഉപയോഗിക്കുന്നത്. എന്നാല്‍ ഇവ തിരഞ്ഞെടുക്കുമ്പോള്‍ പ്രധാനമായി ശ്രദ്ധിക്കേണ്ട ചില കാര്യങ്ങളുണ്ട്.
പ്രധാനമായും ചര്‍മ്മത്തിന്റെ സ്വഭാവം മനസ്സിലാക്കി അതിന് അനുസരിച്ച് വേണം സണ്‍സ്‌ക്രീന്‍ തിരഞ്ഞെടുക്കേണ്ടത്. എണ്ണമയമുള്ള ചര്‍മ്മക്കാര്‍ ഓയല്‍ ഫ്രീ വാട്ടര്‍ ബെയ്‌സ്ഡ് സണ്‍സ്‌ക്രീന്‍ ലോഷന്‍ വേണം തിരഞ്ഞെടുക്കാന്‍. എന്നാല്‍ വരണ്ട ചര്‍മ്മക്കാര്‍ക്ക് ക്രീം ബെയ്‌സ്ഡ് സണ്‍സ്‌ക്രീന്‍ തിരഞ്ഞെടുക്കേണ്ടതാണ്. എന്നാല്‍ മുഖക്കുരു ഉള്ള ആളുകള്‍ക്ക് ജെല്‍ ബെയ്‌സ്ഡ് സണ്‍സ്‌ക്രീന്‍ തിരഞ്ഞെടുക്കാം. സാധാരണയായി സണ്‍സ്‌ക്രീന്‍ തിരഞ്ഞെടുക്കുമ്പോള്‍ ശ്രദ്ധിക്കേണ്ടത് അതില്‍ രേഖപ്പടുത്തിയ എസ്പിഎഫ്, പിഎ എന്നിവയാണ്. എസ്പിഎഫ് എന്നാല്‍ സണ്‍ പ്രൊട്ടക്ഷന്‍ ഫാക്ടര്‍ ആണ്.
സൂര്യതാപത്തിനു കാരണമായ അള്‍ട്രാവയലറ്റ് ബി രശ്മികളില്‍ നിന്നുള്ള സംരക്ഷണമാണ് എസ്പിഎഫ് നല്‍കുന്നത്. അകാല വാര്‍ദ്ധക്യത്തിനും ചിലതരം ത്വക്ക് അര്‍ബുദങ്ങള്‍ക്കും കാരണമായ അള്‍ട്രാവയലറ്റ് രശ്മികളില്‍ നിന്നുള്ള സംരക്ഷണമാണ് പിഎ നല്‍കുന്നത്. എല്ലാ സണ്‍സ്‌ക്രീനിലും എസ്പിഎഫിന്റെയും പിഎയുടെയും അളവ് രേഖപ്പെടുത്തിയിരിക്കും. എസ്പിഎഫിന്റെ കൂടെയുള്ള അക്കങ്ങളും, പിഎയുടെ കൂടെയുള്ള ‘+’ ചിഹ്നങ്ങളുടെ എണ്ണവും നോക്കി വേണം സണ്‍സ്‌ക്രീന്‍ തിരഞ്ഞെടുക്കേണ്ടത്. ചര്‍മ്മത്തിന്റെ സ്വഭാവത്തിനും, വെയിലിന്റെ കാഠിന്യം, കാലാവസ്ഥ എന്നിവ അനുസരിച്ച് ഇതില്‍ മാറ്റം വരാം.
Comments