ഭീകരവാദത്തിന് ഇരട്ടത്താപ്പ് പാടില്ല, ഭീകരരെ സഹായിക്കുന്നവര്‍ക്കും സ്ഥാനമില്ല; പാകിസ്താന് മുന്നറിയിപ്പുമായി രാജ്‌നാഥ് സിങ്

ദുഷാന്‍ബെ: ഭീകരവാദത്തിനെതിരെ ശക്തമായ നിലപാട് ആവര്‍ത്തിച്ച് കേന്ദ്ര പ്രതിരോധ മന്ത്രി രാജ്‌നാഥ് സിങ്. ഭീകരവാദം സമാധാനത്തിനും വികസനത്തിനും വലിയ ഭീഷണിയാണെന്ന് അദ്ദേഹം പറഞ്ഞു. നിരപരാധികളുടെ ജീവനെടുക്കുന്നതിനു പുറമെ നിക്ഷേപത്തെയും വ്യാപാരത്തെയും ഭീകരവാദം തകര്‍ക്കുന്നു. സമൂഹത്തില്‍ തീവ്രവാദ ചിന്തകള്‍ വളര്‍ത്തുകയും യുവാക്കള്‍ക്ക് ലഭിക്കേണ്ട അവസരങ്ങള്‍ ഇല്ലാതാക്കുകയും ചെയ്യുന്നുവെന്നും അദ്ദേഹം വ്യക്തമാക്കി. ഷാങ്ഹായ് സഹകരണ സംഘടനയുടെ (എസ്സിഒ) ഗവണ്‍മെന്റ് മേധാവിമാരുടെ കൗണ്‍സില്‍ യോഗത്തിലായിരുന്നു രാജ്‌നാഥ് സിങ്ങിന്റെ പരാമര്‍ശം. ഭീകരവാദത്തെക്കുറിച്ച് അദ്ദേഹം നിലപാട് വ്യക്തമാക്കുമ്പോള്‍ പാകിസ്താന്‍ ഉപപ്രധാനമന്ത്രി ഇഷാഖ് ദാറും യോഗത്തിലുണ്ടായിരുന്നു.

ഭീകരവാദത്തിന് ഒരു തരത്തിലുള്ള ന്യായീകരണവും നല്‍കാനാവില്ലെന്ന് രാജ്‌നാഥ് സിങ് വ്യക്തമാക്കി. ഭീകരവാദത്തെ നേരിടുന്നതില്‍ ഇരട്ടത്താപ്പ് പാടില്ലെന്നും ഭീകരര്‍ക്ക് സാമ്പത്തിക സഹായം നല്‍കുന്നവര്‍ക്കും പിന്തുണയ്‌ക്കുന്നവര്‍ക്കും സുരക്ഷിത താവളങ്ങള്‍ ഒരുക്കുന്നവര്‍ക്കും സ്ഥാനമുണ്ടാകരുതെന്നും അദ്ദേഹം പറഞ്ഞു. ഭീകരവാദത്തിന്റെ മുഴുവന്‍ ശൃംഖലയെയും കൂട്ടായും ശക്തമായും തകര്‍ക്കേണ്ടത് അനിവാര്യമാണെന്നും പ്രതിരോധ മന്ത്രി വ്യക്തമാക്കി. അതിര്‍ത്തി കടന്നുള്ള ഭീകരവാദത്തിനെതിരായ ഇന്ത്യയുടെ നിലപാട് ആവര്‍ത്തിച്ച രാജ്‌നാഥ് സിങ്, പാകിസ്താനില്‍ നിന്ന് വീണ്ടും ഭീകരാക്രമണങ്ങളുണ്ടായാല്‍ കൂടുതല്‍ ശക്തമായ തിരിച്ചടി നേരിടേണ്ടിവരുമെന്ന് ഒക്ടോബര്‍ 15ന് മുന്നറിയിപ്പ് നല്‍കിയിരുന്നു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

ചര്‍ച്ചകള്‍ക്കും സഹവര്‍ത്തിത്വത്തിനും തര്‍ക്കങ്ങള്‍ സമാധാനപരമായി പരിഹരിക്കുന്നതിനുമാണ് ഇന്ത്യയുടെ സംസ്‌കാരം പ്രാധാന്യം നല്‍കുന്നതെന്ന് അദ്ദേഹം പറഞ്ഞു. എന്നാല്‍, സമാധാനത്തിനുള്ള ഇന്ത്യയുടെ പ്രതിബദ്ധതയെ ദൗര്‍ബല്യമായി കാണരുതെന്നും അദ്ദേഹം മുന്നറിയിപ്പ് നല്‍കി. ഓപ്പറേഷന്‍ സിന്ദൂര്‍, ബാലാകോട്ട് വ്യോമാക്രമണം, സര്‍ജിക്കല്‍ സ്‌ട്രൈക്കുകള്‍ എന്നിവ വെറും സൈനിക നടപടികളായിരുന്നില്ലെന്നും ഭീകരവാദത്തിനെതിരായ ഇന്ത്യയുടെ സമീപനത്തില്‍ നിര്‍ണായകമായ മാറ്റത്തിന്റെ പ്രതീകങ്ങളായിരുന്നുവെന്നും രാജ്‌നാഥ് സിങ് നേരത്തെ പറഞ്ഞിരുന്നു. നയതന്ത്ര പ്രതിഷേധങ്ങളില്‍ ഒതുങ്ങാതെ ഭീകരവാദത്തിന്റെ ഉറവിടങ്ങളിലേക്ക് നേരിട്ട് കടന്ന് നടപടിയെടുക്കുന്ന സമീപനമാണ് ഇന്ത്യ സ്വീകരിച്ചതെന്നും അദ്ദേഹം വ്യക്തമാക്കി.