കാണികളിരമ്പുന്ന സ്റ്റേഡിയം; ഇന്ത്യ-ഓസ്‌ട്രേലിയ പരമ്പര ആവേശമാകും

അഡ്‌ലയിഡ്: ഇന്ത്യക്കെതിരെ ഓസ്‌ട്രേലിയയുടെ കൊറോണ കാലത്തെ ആദ്യ പരമ്പരയില്‍ കാണികളെ പ്രവേശിപ്പിക്കാന്‍ തീരുമാനം. പകലും രാത്രിയുമായി നടക്കുന്ന ആദ്യ ടെസ്റ്റിനാണ് ക്രിക്കറ്റ് ഓസ്‌ട്രേലിയ കാണികളെ പ്രവേശിപ്പിക്കാനുള്ള അനുമതി സ്വന്തമാക്കിയത്. പാരന്പര്യ വൈരികളെപ്പോലെ കളിക്കുന്ന ഇന്ത്യ-ഓസ്ട്രേലിയ പോരാട്ടത്തിൽ കാണികളിരന്പിയാർക്കുന്ന അന്തരീക്ഷം കൊറോണകാലത്തെ നിരാശയകറ്റുമെന്നാണ് ക്രിക്കറ്റ് ഓസ്ട്രേലിയ പ്രതീക്ഷിക്കുന്നത്.

ആദ്യ ടെസ്റ്റില്‍ അഡ്‌ലയ്ഡില്‍ അന്‍പത് ശതമാനം കാണികളെ പ്രവേശിപ്പിക്കാനാണ് സി.എയുടെ തീരുമാനം. നാല് ടെസ്റ്റുകളും മൂന്ന് ഏകദിനങ്ങളും മൂന്ന് ടി20 മത്സരങ്ങളുമടങ്ങുന്ന സമ്പൂര്‍ണ്ണ പരമ്പരയാണ് നടക്കാന്‍ പോകുന്നത്. ഈ മാസം 27-ാം തീയതിയാണ് പരമ്പര ആരംഭിക്കുന്നത്. ആദ്യ രണ്ട് ഏകദിനങ്ങളിലും സിഡ്‌നിയിലാണ് നടക്കുന്നത്. മൂന്നാം ഏകദിനം കാന്‍ബറയിലാണ്.

കാന്‍ബറയില്‍ത്തന്നെ ആദ്യ ടി20 മത്സരം ഡിസംബര്‍ നാലിന് നടക്കും.സിഡ്‌നിയില്‍ രണ്ടും മൂന്നും ടി20കളും അരങ്ങേറും. ആദ്യ ടെസ്റ്റ് ഡിസംബര്‍ 17ന് അഡ്‌ലയ്ഡിലാണ്. രണ്ടാം ടെസ്റ്റ് മെല്‍ബണിലും മൂന്നാം ടെസ്റ്റ് സിഡ്‌നിയിലും അവസാനത്തെ ടെസ്റ്റ് ബ്രിസ്‌ബെയിനിലുമാണ് അരങ്ങേറുക.