കോഴിക്കോട്: ഗോകുലം കേരള എഫ്സി മിഹിര് സാവന്തിനെ ഗോള്കീപ്പിംഗ് പരിശീലകനായി നിയമിച്ചു. ഐ ലീഗ് തയ്യാറെടുപ്പിന് മുന്നോടിയായിട്ടാണ് നീക്കം. മൊഹമ്മദന്സ് എസ് സി, വാസ്കോ, ഡെംപോ എസ് സി തുടങ്ങിയ ടീമുകള്ക്ക് വേണ്ടി കളിച്ചിട്ടുളള മിഹിര് സാവന്ത് ഐ ലീഗ് മുന് ഗോള്കീപ്പര് കൂടിയാണ്.
ചര്ച്ചില് ബ്രദേഴ്സ്, ഹൈദരാബാദ് എഫ്സി, ജംഷദ്പൂര് എഫ്സി (റിസര്വ്വ് ടീം) തുടങ്ങിയവര്ക്ക് പരിശീലനം നല്കിയിട്ടുളള മിഹിര് സാവന്തിന്റെ സേവനം ഗുണം ചെയ്യുമെന്ന പ്രതീക്ഷയിലാണ് ഗോകുലം എഫ്സിയുടെ ആരാധകരും. ലെവല് 3 ഗോള്കീപ്പിംഗ് കോച്ചിംഗ് ലെസന്സുളള പരിശീലകനാണ് 33 കാരനായ മിഹിര് സാവന്ത്.
കളിയെ ഹൃദയത്തോട് ചേര്ത്തുവെക്കുന്ന കേരളത്തിലേക്ക് വരാന് കഴിഞ്ഞതില് സന്തോഷമുണ്ടെന്ന് മിഹിര് സാവന്ത് പ്രതികരിച്ചു. ഇതിനോടകം നിരവധി പരിശീലക സെഷനുകളില് പങ്കെടുക്കാന് കഴിഞ്ഞതായും ഗോകുലം എഫ്സിയുടെ പരിശീലനച്ചുമതല വലിയ അവസരമായിട്ടാണ് കാണുന്നതെന്നും ഐ ലീഗ് കിരീടം ഉള്പ്പെടെയാണ് ലക്ഷ്യമിടുന്നതെന്നും മിഹിര് കൂട്ടിച്ചേര്ത്തു. രാജ്യത്തെ യുവ പരിശീലകനും പരിചയസമ്പന്നനുമായ മിഹിറിനെ ടീമിന്റെ ഭാഗമാക്കാന് സാധിച്ചത് നേട്ടമാണെന്ന് ഗോകുലം കേരള എഫ്സി സിഇഒ ഡോ. ബി അശോക് കുമാര് പറഞ്ഞു.
