ലണ്ടന്‍: ഫുട്‌ബോള്‍ ലോകത്തിന് ഒരു ഇതിഹാസ താരത്തെക്കൂടി നഷ്ടപ്പെട്ടു. ആഫ്രിക്കന്‍ രാജ്യമായ സെനഗലിന്റെ പാപ്പ ബൗബ ജിയോപാണ് അന്തരിച്ചത്. 42 വയസ്സുകാരനായ പാപ്പാ കഴിഞ്ഞ ഏതാനും നാളുകളായി രോഗബാധിതനായിരുന്നു . രാജ്യത്തിനായി അറുപതിലേറെ അന്താരാഷ്‌ട്ര മത്സരങ്ങളില്‍ കഴിവുതെളിയിച്ച പാപ്പാ ബൗബ ദിയോപ് 2002 ല്‍ ജപ്പാനിലും ദക്ഷിണകൊറിയയിലുമായി നടന്ന ലോകകപ്പില്‍ ഫ്രാന്‍സിനെ ഏക ഗോളിന് അട്ടിമറിച്ച താരമാണ്. നിരവധി യൂറോപ്പ്യന്‍ ക്ലബ്ബുകള്‍ക്കായും പാപ്പാ ദിയോപ് ബൂട്ടുകെട്ടി.
‘പാപ്പാ ബൗബ ഒരിക്കല്‍ ഒരു ലോകകപ്പിന്റെ താരം, എല്ലായ്‌പ്പോഴും ഒരു ലോകകപ്പ് വീരനായകന്‍’ എന്നാണ് അനുശോചന സന്ദേശത്തില്‍ ഫിഫ വിശേഷിപ്പിച്ചത്. പാപ്പാ കളിച്ചിരുന്ന ഫ്രഞ്ച് ക്ലബ്ബ് ലെന്‍സും ഇംഗ്ലീഷ് പ്രീമിയര്‍ ലീഗിലെ ഫുള്‍ഹാമും പോര്‍ട്ട്‌സ്മൗത്തും തങ്ങളുടെ മുന്‍ ഇതിഹാസതാരത്തിന് ആദരാഞ്ജലികള്‍ അര്‍പ്പിച്ചു. 2007-08ല്‍ പോര്‍ട്ട്‌സ്മൗത്ത് എഫ്. എ കപ്പ് നേടിയതിലും പാപ്പായുടെ മികച്ച പങ്കാളിത്തമുണ്ടായിരുന്നു. ഏഴുവര്‍ഷം മുമ്പ് കളിനിര്‍ത്തും മുമ്പ് വെസ്റ്റ്ഹാമിലും ബിര്‍മിംഗ്ഹാം സിറ്റിയിലും പാപ്പാ ബൗബ ദിയോപ് ഒരു വര്‍ഷം വീതം കളിച്ചു.
2002 ലോകകപ്പിനെ അവിസ്മരണയീയമാക്കിയ ആഫ്രിക്കന്‍ താരം ഫ്രാന്‍സിനെതിരെ നേടിയ ഒരു ഗോളിന് പുറമേ ടൂര്‍ണ്ണമെന്റില്‍ രണ്ടു ഗോളുകള്‍ കൂടി നേടിയാണ് മടങ്ങിയത്. കരുത്തരായ ഉറുഗ്വയെ 2-2ന് സെനഗല്‍ സമനിലയില്‍ തളച്ചപ്പോള്‍ രണ്ടു ഗോളും പാപ്പായുടെ വകയായിരുന്നു. ആ ലോകകപ്പില്‍ ആദ്യമായി സെനഗല്‍ ക്വാര്‍ട്ടറിലും കടന്നു.
