ജീത്തു ജോസഫ് മോഹൻലാൽ കൂട്ടുകെട്ടിൽ പുറത്തിറങ്ങിയ ചിത്രം ദൃശ്യം 2ന്റെ വിശേഷങ്ങൾ സോഷ്യൽ മീഡിയയിൽ അവസാനിക്കുന്നില്ല. ജീത്തു ജോസഫ് എന്ന സംവിധായകനും മോഹൻലാൽ എന്ന നടനുമെല്ലാം കയ്യടിനേടുകയാണ്. സിനിമകണ്ടിറങ്ങിയവർ ഒരുപോലെ തേടുന്ന ചിത്രത്തിലെ മറ്റൊരു താരമാണ് രേണുക വക്കീൽ. ജീവിതത്തിലും വക്കീലായ ശാന്തി പ്രിയയാണ് രേണുകയായെത്തിയത്.
ഇപ്പോഴിതാ ദൃശ്യത്തിന് മൂന്നാം ഭാഗമുണ്ടാകുമോ എന്ന ചോദ്യത്തിന് ഉത്തരവുമായെത്തിയിരിക്കുകയാണ് ശാന്തി. ‘സിനിമ കണ്ടിറങ്ങുമ്പോൾ ദൃശ്യം 3 വരുമെന്ന് തോന്നുന്നില്ലേ’ എന്നായിരുന്നു ശാന്തിയുടെ മറുപടി. ദൃശ്യം 3 വന്നാലും ജോർജ്ജുകുട്ടിയുടെ അഭിഭാഷക താൻ തന്നെയായിരിക്കുമെന്നും ജീത്തു ജോസഫിനോട് ഇക്കാര്യം തമാശ രൂപേണ പറഞ്ഞിട്ടുണ്ടെന്നും ശാന്തി പറയുന്നു.
‘ജോർജ്ജ് കുട്ടി കേസ് ഇനി എവിടെ വാദിക്കേണ്ടി വന്നാലും താൻ അഭിമാനത്തോടെ ഏറ്റെടുക്കും. ഇത്ര ബോധവും കാര്യങ്ങൾ വ്യക്തവുമായി അറിയിക്കുന്ന ക്ലൈയിന്റ് അല്ലേ. വക്കീൽ ജോലിക്കിടയിലും ഇത്തരത്തിൽ ക്ലൈന്റ്‌സിനെ താൻ കണ്ടിട്ടുണ്ട്. ഇവിടെ ജോർജ്ജ് കുട്ടി അതിനെക്കാൾ എല്ലാം വളരെ മുകളിലാണ്’ ശാന്തി പറഞ്ഞു.
രേണുക വക്കീലിനെ മലയാളികൾ മുൻപും കണ്ടിട്ടുണ്ട്. അതും വക്കീലായി തന്നെ. ആദ്യം കണ്ടത് രമേഷ് പിഷാരഡി സംവിധാനം ചെയ്ത ഗാനഗന്ധർവ്വനിൽ ആയിരുന്നു. അന്ന് ശാന്തി വന്നത് മമ്മൂട്ടിയ്‌ക്ക് വേണ്ടി വാദിക്കാനായിരുന്നു. ഇന്നിതാ മോഹൻലാലിന് വേണ്ടിയും.
