വിസ്മയയുടെ പുസ്തകത്തിന് അമിതാഭ് ബച്ചൻ നൽകിയ ആശംസയ്ക്ക് നന്ദി പറഞ്ഞ് മോഹൻലാൽ. വിസ്മയയുടെ കാവ്യ-ചിത്ര പുസ്തകം ഗ്രെയിൻസ് ഓഫ് സ്റ്റാർഡസ്റ്റിനെ കുറിച്ചുള്ള അഭിപ്രായം പങ്കുവച്ചാണ് ബച്ചൻ ആശംസകൾ നേർന്ന് എത്തിയത്. അച്ഛനെന്ന നിലയിൽ അഭിമാനകരമായ നിമിഷമാണിതെന്ന് താരത്തിന് നന്ദി അറിയിച്ച് മോഹൻലാൽ പറഞ്ഞു.
‘ഒരു ഇതിഹാസത്തിന്റെ പക്കൽ നിന്നും ലഭിക്കുന്ന അഭിനന്ദന വാക്കുകളാണ് മായയ്ക്ക് കിട്ടാവുന്ന ഏറ്റവും മികച്ച അഭിനന്ദവും അനുഗ്രഹവും. അച്ഛനെന്ന നിലയിൽ എന്നെ സംബന്ധിച്ചിടത്തോളം ഇത് അഭിമാനകരമായ നിമിഷമാണ്. നന്ദി അമിതാഭ് ബച്ചൻ സാർ’ മോഹൻലാൽ മറുപടി നൽകി.
മോഹൻലാലിന്റെ മകൾ എഴുതിയ പുസ്തകം വായിച്ചു. കഴിവ് പാരമ്പര്യമെന്നാണ് അമിതാഭ് ബച്ചൻ പറഞ്ഞത്. ‘മോഹൻലാൽ മലയാള സിനിമയുടെ സൂപ്പർ താരമാണ്. എനിക്ക് ഒരുപാട് ആരാധനയുള്ള ആൾ. അദ്ദേഹത്തിന്റെ മകൾ വിസ്മയ എഴുതിയ ഗ്രെയിൻസ് ഓഫ് സ്റ്റാർഡസ്റ്റ് എന്ന പുസ്തകം എനിക്ക് അയച്ചു തന്നിരുന്നു. കവിതകളിലൂടെയും ചിത്രങ്ങളിലൂടെയും സർഗ്ഗാത്മകവും സൂക്ഷ്മവുമായ യാത്ര. കഴിവ് പാരമ്പര്യമാണ്. എല്ലാ ഭാവുകങ്ങളും നേരുന്നു’ ബച്ചൻ കുറിച്ചു.
ജാപ്പനീസ് ഹൈക്കു കവിതകളിൽ നിന്ന് പ്രചോദനം ഉൾക്കൊണ്ട് എഴുതിയ എഴുപതിലധികം ചെറുകവിതകളും അതിനനുസരിച്ച് വരച്ച ചിത്രങ്ങളും ചേർന്നതാണ് പുസ്തകം. പത്തും പതിനഞ്ചും വരികളുള്ള കവിതകൾ മുതൽ ഒറ്റവരി കവിതകൾ വരെ പുസ്തകത്തിലുണ്ട്. ഓൺലൈൻ വിപണിയിലടക്കം പുസ്തകത്തിന് വലിയ സ്വീകാര്യതയാണ് ലഭിക്കുന്നത്. വിസ്മയയുടെ ആദ്യ പുസ്തകമാണിത്.
Comments