ദൃശ്യം 2 വമ്പൻ ഹിറ്റായതോടെ മൂന്നാം ഭാഗത്തിനായുള്ള കാത്തിരിപ്പിലാണ് ഭൂരിഭാഗം ആരാധകരും. ഇതിനിടെ ദൃശ്യം മൂന്നാം ഭാഗത്തിന്റെ കഥയെഴുതി അയക്കാൻ സംവിധായകൻ ജീത്തു ജോസഫ് ആവശ്യപ്പെട്ടു എന്ന തരത്തിൽ വാർത്തകളും പ്രചരിച്ചിരുന്നു. എന്നാൽ ഇത് വ്യാജ വാർത്തയാണെന്ന് വ്യക്തമാക്കിയിരിക്കുകയാണ് ജീത്തു ജോസഫ്.
ദൃശ്യം 3യുടെ കഥ ആരും അയക്കരുതെന്നും നിലവിൽ ആ സിനിമയെ കുറിച്ച് ചിന്തിക്കുന്നില്ലെന്നുമാണ് അദ്ദേഹം അറിയിച്ചിരിക്കുന്നത്. ഇനി ചെയ്യുന്നുണ്ടെങ്കിൽ മറ്റാരുടേയും കഥ വാങ്ങാൻ ഉദ്ദേശിച്ചിട്ടില്ലെന്നും അദ്ദേഹം വ്യക്തമാക്കി. ഫേസ്ബുക്കിലൂടെയായിരുന്നു വ്യാജവാർത്തകൾക്കെതിരെ ജീത്തു ജോസഫ് എത്തിയത്.
ജീത്തു ജോസഫിന്റെ വാക്കുകൾ ഇങ്ങനെ ‘കുറച്ച് ദിവസമായി സമൂഹമാദ്ധ്യമങ്ങളിൽ എന്റെ ഒരു ഇമെയിൽ ഐഡി പ്രചരിക്കുന്നുണ്ട്. അതിലേക്ക് ദൃശ്യം 3യുടെ കഥ അയച്ചുകൊടുക്കുക. അത് എനിക്ക് ഇഷ്ടപ്പെട്ടാൽ ഞാൻ അത് സിനിമയാക്കുമെന്ന് പറഞ്ഞ് ആരോ ഒരു വാർത്ത പ്രചരിപ്പിക്കുന്നുണ്ട്. ഞാൻ ഇമെയിൽ ഐഡി ഉപയോഗിക്കുന്നത് വേറെ കഥകളായി വരുന്നവർക്കും, സിനിമയിൽ അഭിനയിക്കാൻ താത്പര്യമുള്ളവർക്കും വേണ്ടിയായിരുന്നു. ഒരു എഫ്എം അഭിമുഖത്തിൽ ഞാൻ അത് സൂചിപ്പിക്കുകയും ചെയ്തിരുന്നു. പക്ഷെ ഇപ്പോൾ കുറേ മെയിൽ വന്നതിനെ തുടർന്ന് ആ അക്കൗണ്ടിലേക്ക് വരുന്ന മെയിലെല്ലാം തിരിച്ച് പോയിക്കൊണ്ടിരിക്കുകയാണ്.
പിന്നെ ദയവ് ചെയ്ത് ദൃശ്യം 3യുടെ കഥ ആരും അയക്കേണ്ട. കാരണം ആ സിനിമ ഉടനെ ചെയ്യുന്നതിനെ കുറിച്ച് ഞാൻ ആലോചിച്ചിട്ടില്ല. അങ്ങനെയൊരു ആലോചന ഉണ്ടെങ്കിൽ തന്നെ അത് എന്റെ കഥ വെച്ചായിരിക്കും ചെയ്യുന്നത്. ജീത്തു ജോസഫ് പറഞ്ഞു. ദൃശ്യം 3യുടെ പേരിൽ വരുന്ന കഥകൾ താൻ നോക്കാതെ തന്നെ അങ്ങ് ഡിലീറ്റ് ചെയ്ത് കളയുകയാണ് ചെയ്യുന്നതെന്നും അദ്ദേഹം വ്യക്തമാക്കി. ആ ഇമെയിൽ ഐഡി ഇപ്പോൾ എനിക്ക് ഉപയോഗിക്കാൻ സാധിക്കുന്നില്ല. ഇങ്ങനെയൊരു വാർത്ത ആരെങ്കിലും കാണുകയാണെങ്കിൽ അത് തെറ്റായ വാർത്തയാണെന്ന് ഓർമിക്കണ’മെന്നും ജീത്തു പറയുന്നു.
Comments