മഞ്ജു വാര്യർ ബോളിവുഡിലേക്ക്: ആദ്യ ചിത്രം മാധവനൊപ്പം, ആരാധകർ ആകാംക്ഷയിൽ

കൊച്ചി: മലയാളികളുടെ ലേഡി സൂപ്പർ സ്റ്റാർ മഞ്ജുവാര്യർ ബോളിവുഡിലേക്ക്. കഴിഞ്ഞ ദിവസം ദ പ്രീസ്റ്റിന്റെ പ്രസ്സ് മീറ്റിനിടെയാണ് ബോളിവുഡ് അരങ്ങേറ്റത്തെ കുറിച്ചുള്ള ചില സൂചനകൾ താരം നൽകിയത്. ഇതിന് തൊട്ടുപിന്നാലെ സിനിമയുടെ കൂടുതൽ വിവരങ്ങൾ പുറത്തുവരുകയാണ്.

ചലച്ചിത്ര നിരൂപകനും നിരീക്ഷകനുമായ ശ്രീധർ പിള്ളയാണ് ചിത്രത്തെ കുറിച്ചുള്ള കൂടുതൽ വിവരങ്ങൾ പുറത്തുവിട്ടത്. മാധവനാണ് ചിത്രത്തിൽ നായകനായെത്തുന്നത്. അമേരിക്കി പണ്ഡിറ്റ് എന്നാണ് ചിത്രത്തിന്റെ പേര്. നവാഗതനായ കൽപേഷാണ് ചിത്രത്തിന്റെ സംവിധാനം നിർവ്വഹിക്കുന്നത്.  ചിത്രം ഭോപ്പാലിലാകും ഷൂട്ട് ചെയ്യുക. കൂടുതൽ വിവരങ്ങൾ പിന്നാലെയുണ്ടാവുമെന്നും ശ്രീധർ പിള്ള ട്വീറ്റ് ചെയ്തു. പുതിയ വിവരങ്ങൾ പുറത്തുവന്നതോടെ ആരാധകർ ആകാംക്ഷയിലാണ്.

അതേസമയം മഞ്ജുവാര്യരും മമ്മൂട്ടിയും ഒന്നിക്കുന്ന ചിത്രം ദ പ്രീസ്റ്റ് നാളെ തീയേറ്ററുകളിലെത്തും. പ്രിയദർശൻ-മോഹൻലാൽ ചിത്രം മരക്കാർ അറബിക്കടലിന്റെ സിംഹം, സന്തോഷ് ശിവന്റെ ജാക്ക് ആൻഡ് ജിൽ, സനൽ കുമാർ ശശിധരന്റെ കയറ്റം, രൺജീത് കമല ശങ്കറും സലിലും ചേർന്ന് സംവിധാനം ചെയ്യുന്ന ചതുർമുഖം തുടങ്ങി നിരവധി സിനിമകളാണ് മഞ്ജുവിന്റേതായി അണിയറയിൽ ഒരുങ്ങുന്നത്.

Wishing #ManjuWarrier all the best as she makes her #Bollywood debut opposite @ActorMadhavan . @ManjuWarrier4 will shoot for the #Hindi film in #Bhopal. Other details to follow. pic.twitter.com/HBNWDk1mwH

— Sreedhar Pillai (@sri50) March 10, 2021