രൗദ്രം രണം രുധിരം ചിത്രത്തിന്റെ ക്യാരക്ടര് പോസ്റ്റര് പുറത്തുവിട്ട് അണിയറ പ്രവര്ത്തകര്. ചിത്രത്തില് സീതയായി വേഷമിടുന്ന ബോളിവുഡ് താരം ആലിയ ഭട്ടിന്റെ ക്യാരക്ടര് പോസ്റ്ററാണ് ഇപ്പോള് അണിയറ പ്രവര്ത്തകര് പുറത്തു വിട്ടിരിക്കുന്നത്. പോസ്റ്ററുകള് ഇതിനോടകം തന്നെ ആരാധകര്ക്കിടയില് ശ്രദ്ധ നേടി. മികച്ച സ്വീകാര്യതയാണ് ഈ പോസ്റ്റിന് ലഭിച്ചത്.
ബ്രഹ്മാണ്ഡ ചിത്രമായ ബാഹുബലിക്ക് ശേഷം രാജമൗലിയുടെ സംവിധാനത്തില് ഒരുങ്ങുന്ന മറ്റൊരു ചിത്രമാണ് ആര്ആര്ആര് എന്ന ചുരുക്കപ്പേരില് അറിയപ്പെടുന്ന രൗദ്രം രണം രുധിരം. 1920- കാലഘട്ടത്തിലെ അല്ലൂരി സീതാരാമ രാജു, കോമരം ഭീം എന്നീ സ്വാതന്ത്യ സമരസേനാനികളുടെ കഥ പറഞ്ഞു പോകുന്ന ഈ ചിത്രത്തില് പ്രധാന കഥാപാത്രമായ അല്ലൂരി സീതാരാമനായി എത്തുന്നത് രാംചരണ് ആണ്.
ചിത്രത്തിലെ മറ്റ് പ്രധാന കഥാപാത്രമായ കോമരം ഭീം ആയി എത്തുന്നത് ജൂനിയര് എന്ടിആര് ആണ്. ഇവരെ കൂടാതെ ബോളിവുഡ് താരം അജയ് ദേവ്ഗണും ചിത്രത്തില് ഒരു കേന്ദ്ര കഥാപാത്രത്തെ അവതരിപ്പിക്കുന്നു. ബോളിവുഡ് താരങ്ങളായ ആലിയ ഭട്ട്, അജയ് ദേവ്ഗണ് എന്നിവരുടെ ആദ്യ ദക്ഷിണേന്ത്യന് ചിത്രം കൂടിയാണിത്. 450 കോടി മുതല് മുടക്കില് ഒരുങ്ങുന്ന ഈ ചിത്രം ഡിവിവി എന്റര്ടെയിന്മെന്റ്സിന്റെ ബാനറില് ഡിവിവി ധനയ്യ ആണ് നിര്മിക്കുന്നത്. കഴിഞ്ഞ വര്ഷം മാര്ച്ചില് ചിത്രീകരണം പൂര്ത്തിയാക്കി ജൂലൈ 30 ന് റിലീസ് ചെയ്യാനിരുന്ന ചിത്രം കൊറോണയുടെ പശ്ചാത്തലത്തില് പ്രതിസന്ധിയിലാകുകയായിരുന്നു.
എന്നാല് ഒക്ടോബര് 13 ന് ചിത്രം റിലീസ് ചെയ്യാന് സാധിക്കുമെന്നാണ് ഇപ്പോള് അണിയറ പ്രവര്ത്തകര് അറിയിച്ചിരിക്കുന്നത്. എം. എം. കീരവാണിയാണ് ചിത്രത്തിന്റെ സംഗീതം നിര്വഹിക്കുന്നത്. കളക്ഷന് റെക്കോഡുകള് ഭേദിച്ച ഒരു ചിത്രമായിരുന്നു 2015 ല് പുറത്തിറങ്ങിയ ബാഹുബലി. ആറു ഭാഷകളില് പുറത്തിറങ്ങിയ ചിത്രത്തിന് മികച്ച സ്വീകാര്യതയാണ് ഭാഷകളില് പ്രേക്ഷകരുടെ ഭാഗത്തുനിന്നും ഉണ്ടായിട്ടുള്ളത്. അത്തരത്തില് ഒരു മികച്ച ചിത്രം തന്നെ ആയിരിക്കും രുദ്രം രണം രുധിരം എന്നാണ് പ്രേക്ഷകരുടെ വിശ്വാസം. വീണ്ടും ഒരു ബ്രഹ്മാണ്ഡ ചിത്രത്തിനായുള്ള കാത്തിരിപ്പിലാണ് ആരാധകര്
