കൊൽക്കത്ത : പ്രചാരണ പരിപാടിയ്ക്കിടെ ദേഹാസ്വാസ്ഥ്യം അനുഭവപ്പെട്ട സദസിലുണ്ടായിരുന്ന വനിതയ്ക്ക് സഹായം എത്തിക്കാൻ മൈക്കിലൂടെ ആവശ്യപ്പെട്ട് പ്രധാനമന്ത്രി നരേന്ദ്ര മോദി. പശ്ചിമ ബംഗാളിലെ കൂച്ച് ബിഹാറിൽ നടന്ന പ്രചാരണ റാലിയ്ക്കിടെയായിരുന്നു സംഭവം. പ്രസംഗം നിർത്തിയാണ് അദ്ദേഹം സഹായം എത്തിക്കാൻ മെഡിക്കൽ ടീമിന് നിർദ്ദേശം നൽകിയത്.
നിർജ്ജലീകരണം മൂലം കുഴഞ്ഞു വീണതായിരുന്നു ഇവർ. തളർന്നുവീണ വനിതയ്ക്ക് പെട്ടെന്ന് വെള്ളം നൽകാനും പ്രധാനമന്ത്രി സന്നദ്ധപ്രവർത്തകരോട് ആവശ്യപ്പെട്ടു.
നേരത്തെ അസമിലും ഇത്തരത്തിൽ പ്രചാരണത്തിനിടെ പാർട്ടി പ്രവർത്തകൻ കുഴഞ്ഞു വീണിരുന്നു. അന്നും പ്രധാനമന്ത്രയുടെ മെഡിക്കൽ ടീമാണ് അദ്ദേഹത്തിന്റെ നിർദ്ദേശപ്രകാരം പ്രാഥമിക ചികിത്സ എത്തിച്ചത്.
പ്രോട്ടോക്കോൾ പ്രകാരം നാല് പേരടങ്ങുന്ന വിദഗ്ധ സംഘമാണ് പ്രധാനമന്ത്രിയോടൊപ്പം യാത്ര ചെയ്യുന്നത്. വ്യക്തിഗത വൈദ്യൻ, പാരാമെഡിക്, സർജൻ, ഗുരുതരമായ പരിചരണ വിദഗ്ദ്ധൻ എന്നിവർ സംഘത്തിൽ ഉൾപ്പെടുന്നു. മെഡിക്കൽ എമർജൻസി കിറ്റുകളും ഇവരുടെ കൈവശം ഉണ്ടാകും.
