ടോക്കിയോ: ജപ്പാനെതിരെ പ്രകോപനവുമായി ചൈനയുടെ നീക്കം തുടരുന്നു. സെൻകാകൂ ദ്വീപ് പിടിക്കാനുള്ള ചൈനയുടെ നീക്കമാണ് ശക്തമാകുന്നത്. കിഴക്കൻ ചൈനാ കടലിൽ നിന്നും പസഫിക് മേഖലയിലേക്ക് സൈനിക വിന്യാസം കൂട്ടിയാണ് ചൈനയുടെ പ്രകോപനം. ചൈനയുടെ നീക്കത്തെ ചെറുക്കുമെന്ന് ജപ്പാൻ മുന്നറിയിപ്പ് നൽകി.
തീരസുരക്ഷാ സേനയെന്ന പേരിൽ ചൈന വിന്യസിപ്പിച്ചിരിക്കുന്നത് നാവികസേനയെയാണ്. ചൈനയുടെ നീക്കത്തെപ്പറ്റി പസഫിക്കിലെ ചെറുരാജ്യങ്ങളടക്കം നിരന്തരം മുന്നിറിയിപ്പ് നൽകിയിരുന്നു. അത്തരം സംശയങ്ങൾ ബലപ്പെടുത്തുന്ന നീക്കമാണ് ചൈന വീണ്ടും നടത്തുന്നതെന്ന് അന്താരാഷ്‌ട്ര മാദ്ധ്യമങ്ങൾ പറയുന്നു.
പസഫിക്കിലെ അമേരിക്കൻ സൈന്യത്തിന്റെ സാന്നിദ്ധ്യമാണ് ചൈനയെ സെൻകാകൂ കേന്ദ്രമാക്കാൻ പ്രേരിപ്പിക്കുന്നത്. ഫെബ്രുവരി ഒന്നാം തീയതിയാണ് ചൈന തീരസുരക്ഷാ നിയമം ഭേദഗതി വരുത്തിയത്. ചൈനാ കടലിലെ സേനാ വിഭാഗത്തിന് ആയുധം ഉപയോഗിക്കാനുള്ള അനുവാദമാണ് നൽകിയത്. അതിനനുസരിച്ചുള്ള കപ്പലുകളും തീരസേനയ്‌ക്ക് ലഭ്യമാക്കിയിട്ടുണ്ട്.
ജപ്പാൻ ദ്വീപസമൂഹത്തിന്റെ ഭാഗമായ സെൻകാകൂവിനെ ചൈന വളഞ്ഞുപടിക്കാൻ നടത്തുന്ന ശ്രമത്തിന് രണ്ടു ദശകങ്ങളുടെ പഴക്കമുണ്ട്. ജപ്പാന്റെ അഖണ്ഡതയ്‌ക്കുമേലുള്ള കടന്നുകയറ്റ മാണിതെന്ന് ജപ്പാൻ ആവർത്തിച്ച് ആരോപിച്ചിരുന്നു.
Comments