ന്യൂഡൽഹി : ഇന്ത്യയുടെ ചാന്ദ്രപര്യവേഷണ ദൗത്യമായ ചാന്ദ്രയാൻ 3 ന്റെ വിക്ഷേപണം അടുത്ത വർഷം. ചാന്ദ്രയാൻ 3 ന്റെ നിർമ്മാണ പ്രവർത്തനങ്ങൾ പുരോഗമിക്കുന്നതായി കേന്ദ്ര ബഹിരാകാശ സഹമന്ത്രി ജിതേന്ദ്ര സിംഗ് പറഞ്ഞു. ലോക്സഭയിൽ എഴുതി നൽകിയ മറുപടിയിലാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്.
വിവിധ പ്രക്രിയകളാണ് ചാന്ദ്രയാൻ 3 ന്റെ പൂർത്തീകരണത്തിൽ ഉൾപ്പെട്ടിട്ടുള്ളത്. രൂപരേഖയുടെ അന്തിമ തീരുമാനം, സബ്സിസ്റ്റംസ് റിയലൈസേഷൻ, സംയോജനം, ബഹിരാകാശ പേടകത്തിന്റെ വിശദമായ പരിശോധന, മറ്റ് പരിശോധനകൾ എന്നിവയാണ് ഇവ. കൊറോണ വൈറസ് വ്യാപനം ചാന്ദ്രയാൻ 3 ന്റെ നിർമ്മാണ പ്രവർത്തനങ്ങളെ പ്രതികൂലമായി ബാധിച്ചിട്ടുണ്ട്. എന്നിരുന്നാലും ലോക്ഡൗൺ കാലയളവിൽ കഴിയാവുന്നത്ര നിർമ്മാണ പ്രവർത്തനങ്ങൾ പൂർത്തീകരിച്ചിട്ടുണ്ടെന്നും അദ്ദേഹം പറഞ്ഞു. ലോക്ഡൗണിന് ശേഷം നിർമ്മാണ പ്രവർത്തനങ്ങൾ വേഗത്തിൽ പുരോഗമിക്കുകയാണെന്നും ജിതേന്ദ്ര സിംഗ് കൂട്ടിച്ചേർത്തു.
ചാന്ദ്രയാൻ 2 ന്റെ തുടർച്ചയാണ് ചാന്ദ്രയാൻ 3. ഇതിന്റെ പ്രൊപ്പൽഷൻ മൊഡ്യൂളിന്റെ നിർമ്മാണം പൂർത്തിയായിട്ടുണ്ട്. പ്രൊപ്പൽഷൻ മൊഡ്യൂളിന്റെ അവസാന വട്ട പരീക്ഷണങ്ങൾ പുരോഗമിക്കുകയാണെന്നും അദ്ദേഹം വ്യക്തമാക്കി.
Comments