ഛണ്ഡീഗഡ് : കർണാലിലെ പ്രതിഷേധ സമരം അവസാനിപ്പിച്ച് ഭാരതീയ കിസാൻ യൂണിയൻ. പോലീസ് നടത്തിയ ലാത്തിച്ചാർജിൽ ജുഡീഷ്യൽ അന്വേഷണം പ്രഖ്യാപിക്കുമെന്ന് സർക്കാർ ഉറപ്പ് നൽകിയ പശ്ചാത്തലത്തിലാണ് സമരം അവസാനിപ്പിച്ചത്. കഴിഞ്ഞ അഞ്ച് ദിവസമായി ഇവിടെ പ്രതിഷേധം തുടരുകയാണ്.
അഡീഷൺ ചീഫ് സെക്രട്ടറിയുമായി നടത്തിയ ചർച്ചയ്ക്ക് ശേഷം നടത്തിയ വാർത്താസമ്മേളനത്തിൽ ബികെയു പ്രവർത്തകരാണ് ഇക്കാര്യം അറിയിച്ചത്. സംഭവത്തിൽ വിരമിച്ച ഹൈക്കോടതി ജസ്റ്റിസിന്റെ നേതൃത്വത്തിൽ ജുഡീഷ്യൽ അന്വേഷണം നടത്തുമെന്ന് അഡീഷണൽ ചീഫ് സെക്രട്ടറി ദേവേന്ദർ സിംഗ് ഉറപ്പുനൽകിയതായി പ്രതിഷേധക്കാർ പറഞ്ഞു. മറ്റ് ആവശ്യങ്ങൾ സർക്കാർ അംഗീകരിച്ചെന്നും ഇവർ വ്യക്തമാക്കി.
കഴിഞ്ഞ ഞായറാഴ്ച മുതലാണ് ഭാരതീയ കിസാൻ യൂണിയൻ പ്രവർത്തകർ കർണാലിലെ മിനി സെക്രട്ടറിയേറ്റിന് മുൻപിൽ പ്രതിഷേധം ആരംഭിച്ചത്. കഴിഞ്ഞ മാസം 28 ന് സംയുക്ത കിസാൻ മോർച്ച നടത്തിയ പ്രതിഷേധം അക്രമാസക്തമാകുകയായിരുന്നു. ഇതേ തുടർന്നാണ് പോലീസ് ലാത്തി ചാർജ് നടത്തിയത്.
